અનુસ્વાર

અનુસ્વાર છું 

અક્ષર ઉપર અસ્વાર છું,

નાનકડું બિંદુ છું 

અક્ષરને શિર મીંડું છું,

અંક, અંગ ને આંખમાં ઙ હું 

પાંચ, પંજા ને પુંછમાં ઞ છું,

ઊંટ, કંઠ ને અંડમાં ણ હું 

કાંત, કાંધ ને કાંડામાં ન છું,

પંપ, રંભા ને અંબામા મ હું 

કંપમાં તીવ્ર ને કાંપમાં કોમળ,

ઙ, ઞ, ણ, ન ને મ અનુનાસિકો 

કરો ખુલ્લા નાકે ઉચ્ચારણ,

કંઠ્ય હરોળમાં ઙ અનુનાસિક 

તાલવ્યમાં ઞ, મૂર્ધન્યમાં ણ,

દંતયમાં ન અનુનાસિક 

ઔષ્ઠ્ય હરોળમાં મ બિચારો,

સર્વનામમાં હું ને તું અર્ધાક્ષર છું 

ક્રિયાપદમાં બોલું, લખું છું,

છગનભાઇ ચોરે ગયા 

પણ ઝમકુબેન મંદિરે ગયાં,

નર એક કે અનેક નહીં બિંદી 

નારી એક હોય તો ય બિંદી,

ભાઈ કે ભાઈઓ આવ્યા 

ભાઈ ને ભાભી આવ્યાં,

નાનો પણ નિયમબદ્ધ છું

નાન્યતર જાતિમાં વ્યાપક છું,

કૂતરો કેવો છોકરો કેવો 

કૂતરું કેવું ને કૂતરાં કેવાં,

અનુસ્વાર છું 

નાકનો નાદ છું.