અલગારી બેખુદી

ફૂલોની નાજુક પંખુડીયોમાં વરતારો કોનો,

સુગંધની લહેરખીઓમાં આ અણસારો કોનો !

વસંતની આ મઘમઘતી આબોહવા પછી,

પાનખરમાં ગીત ગાતો આ મૌન નારો કોનો !

કોનું મિલન કોનો વિરહ ને કોની અનુભૂતિ,

મીરાં વગરના મેવાડમાં આ એકતારો કોનો !

અંતર આકાશે ખેંચાયો એક તેજ લિસોટો,

આગ વગર ઝગમગતો આ ઝબકારો કોનો !

આગ લગાડી ગયો એની યાદનો તિખારો,

અંગાર વગર ચમકતો આ ચમકારો કોનો !

મોરલીના નાદે આકાશે ગુંજ્યો શૂન્યસ્વર,

શ્વાસે શ્વાસે નૃત્ય કરતો આ ધબકારો કોનો !

શબ્દોના 'પરમ' મૈખાનામાં અલગારી બેખુદિ,

મારા શાશ્વત 'પાગલ'પનમાં ઈશારો કોનો !