ପ୍ରତୀକ୍ଷିତ
ପ୍ରତୀକ୍ଷିତ
ଗ୍ରହଟିଏ ଯାଇ ବିଲୀନ ହେଲା କି
କୃଷ୍ଣଗର୍ତ୍ତରେ ଆଜି
ଅଥବା ଅସୀମ ଗତିରେ ଦୁଇଟି
ତାରକା ଗଲା କି ବାଜି !
ଅନନ୍ତ ଖଗୋଳେ ହେଲା ହଲଚଲ
ତରଙ୍ଗ ବଳୟ ଖେଳେ
ଗର୍ଭରେ କେମିତି ଅନୁଭବ ହୁଏ
ପ୍ରକମ୍ପନ ଏହି ବେଳେ ।
ପ୍ରଳୟ କାଳରେ ସୂର୍ଯ୍ୟ କି ହୋଇଛି
ବିଭାଜନେ ଖଣ୍ଡ ଖଣ୍ଡ
ନତୁବା ବ୍ରହ୍ମାଣ୍ଡେ ସୃଜନେ ଉଦ୍ୟତ
ହିରଣ୍ମୟ ସେହି ଅଣ୍ଡ !
ମୋର ଗର୍ଭେ ସତ ସ୍ବାଭାବିକ ନୁହଁ
ଗତିବିଧି ଯାହା ଲାଗେ
ବୀଜ ଅଙ୍କୁରଣେ ଉଦ୍ଦୀପନା ନବ
ମାତୃତ୍ବ ଭାବନା ଜାଗେ ।
ମଧୁକୋଷ ପ୍ରାୟେ ରସରେ ପ୍ଳାବିତ
ଏହିକ୍ଷଣେ ଦୁଇ କୁଚ
ଦିବ୍ୟ ଅନୁଭୂତି କରଞ୍ଚେ ସଞ୍ଚାଳି
ପୂର୍ବାପେକ୍ଷା ଲାଗେ ଉଚ୍ଚ ।
ଉନ୍ମାଦନା ଭରା ଅପୂର୍ବ ଆନନ୍ଦେ
ପରିପୂର୍ଣ୍ଣ ମୋର ସୃଷ୍ଟି
ବିଶାଳ ସଂସାରେ ତୋ'ପ୍ରତି ଧନରେ
ନପଡୁ କୁଟିଳ ଦୃଷ୍ଟି ।
ଉଦାରତା ପୂର୍ଣ୍ଣ ଉଦରେ ଏବେ ତ
ପରମାଣୁ ଗତିଶୀଳ
ଅଞ୍ଚଳର ତଳେ ଦୃଷ୍ଟି ଆଢୁଆଳେ
ପ୍ରତୀକ୍ଷିତ ଏକ ତିଳ ।
ପ୍ରସନ୍ନ କୁମାର ମାଦଳା