କାହାକୁ ଦେବି ମୁଁ ଦୋଷ
କାହାକୁ ଦେବି ମୁଁ ଦୋଷ
କି କାରଣେ ସତେ ଶବ କଲ ମୋତେ
ପ୍ରାଣ ମୋର ଥାଉ ଥାଉ
ତୁମ ପାଇଁ ଖେଳ ମୋ ପାଇଁକି କାଳ
ସହି ପାରିଲିନି ଆଉ |
ରାଇଜଟା ସାରା ଇଜ୍ଜତ ଲୁଟେରା
ନିର୍ଦ୍ୱନ୍ଦେ ମାରନ୍ତି ଭାଉ
ଅନୁରୋଧ ମୋର ରଖ ସରକାର
ଇଚ୍ଛା ମୃତ୍ୟୁ ମୋର ହେଉ |
ପଲ୍ଲୀ ଠାରୁ ଦିଲ୍ଲୀ ପିପିଲି କୁନ୍ଦୁଲୀ
ଖୋଲିଦେଲେ ଇତିହାସ
ନ୍ୟାୟ ଖୋଜି ଖୋଜି ସବୁ ଗଲେ ହଜି
କାହାକୁ ଦେବି ମୁଁ ଦୋଷ |
ଭଦ୍ର ମୁଖାଧାରୀ ଅଧିକାରୀ ଧରି
ଅମୃତ ଭାଣ୍ଡରେ ବିଷ
ମାରି ଆଖି ଠାର ଧର୍ମକୁ ତ୍ରିବାର
କରି ପୁଣି ଉପହାସ |
ଖୋଲି ମୋ ଅତୀତ କରି ନିର୍ଯ୍ୟାତିତା
କରନ୍ତି ଫାଇଲି ଚାଷ
ଦୁଷ୍କର୍ମ ଘଟଣା ହୁଏ ବାଟ ବଣା
ବେକରେ ଲଗାଇ ଫାଶ |
ଆଣେ ପୁରସ୍କାର ଆମ ସରକାର
ଲଭୁ ପଛେ ଅପଯଶ
ମାଗିଦେଲେ ପାଣି ଦାରୁ ଦିଏ ଆଣି
ନ ମେଣ୍ଟୁ ପଛକେ ଶୋଷ |