ଓଜୋନ୍ ସ୍ତରରେ କଣା

ନିରେଖ ହେ ନେତ୍ରେ ସମୃଦ୍ଧ ଏ କ୍ଷେତ୍ରେ

ବାତ୍ୟାର କରାଳ ରୂପ

ଦେଖ ଆସ ଦେଖ   ଏବେ ରୂପରେଖ

ଦିଶେ ଯେହ୍ନେ ଭସ୍ମସ୍ତୁପ ।

ନାଶି କେତେ ବୃକ୍ଷ    କରିଗଲା ରୁକ୍ଷ

ସମୁଚୟ ଏହି ମାଟି

ପ୍ରପୀଡ଼ିତ ପ୍ରାଣୀ     ଦୁରବସ୍ଥା ଜାଣି

ହୃଦୟ ପଡୁଛି ଫାଟି ।

ଅତିଶୟ ବାତେ    ବତିଖୁଣ୍ଟ ସାଥେ

ଘରଦ୍ୱାର ଘଲା ଟଳି

ଛୁଇଁଲା ପାତକ    ସତେ କି ଆତଙ୍କ

ପଡିଛି ପ୍ରଳୟ ଭଳି ।

ପ୍ରକୃତିର ଦାଉ    ସହନ୍ତା କେ ଆଉ

ଭାଙ୍ଗିଗଲା ଯେତେ ଟାଣ

ନିମିଷକେ ଆସି     ପ୍ରକୃତି ବିନାଶି

ହରିନେଲା କେତେ ପ୍ରାଣ ।

ଛାତ୍ରାବାସେ କିବା ସେବାକେନ୍ଦ୍ରେ ଥିବା

ବ୍ୟବସ୍ଥା ବି ହେଲା ଧ୍ବସ୍ତ

ବିଜୁଳି କି ପାଣି   ନାହିଁ ବୋଲି ଜାଣି

ଲୋକେ ହେଲେ ଅସ୍ତବ୍ୟସ୍ତ ।

ପ୍ରଦୂଷଣ ଏବେ    ବଢିଲାଣି ଯେବେ

କଳ କାରଖାନା ପାଇଁ

ଗଛବୃକ୍ଷ ବିନେ   ନାଶ ହେବା ଦିନେ

ଉପାୟ ବି ଆଉ କାହିଁ ?

ପ୍ରକୃତିରେ ସିନା     ସନ୍ତୁଳନ ବିନା

ଓଜୋନ୍ ସ୍ତରରେ କଣା

ସ୍ବାଭାବିକ ସ୍ଥିତି    ବିନାଶନେ ଭୀତି

ପଡିଲାଣି ଏବେ ଜଣା ।