ପୁଲୱାମା ପଛର କାହାଣୀ

ଚୌରାଳିଶ ବୀର କବର ନେଲେଣି ଲାଗେ ସବୁ ଖାଁ ଖାଁ

ବୀରତ୍ଵ ବ୍ୟଂଜକ କବିତା ଲେଖୁଛୁ ଆତଙ୍କବାଦୀଙ୍କୁ ନାଁ ।

ପାକିସ୍ତାନ ନାମ ବିଶ୍ୱ ମାନଚିତ୍ରୁ ଉଡାଇବାକୁ ସଂକଳ୍ପ

ନିର୍ବାଚନ ବଂଦ କରି ଲଢିବାକୁ ତିଆରି ହୁଏ ପ୍ରକଳ୍ପ ।

ଜୟଚନ୍ଦ୍ର ବିନା ପୃଥୀରାଜ ବୀର ହାରିଥାନ୍ତେ ଘୋରୀ ପାଶେ

ଶକୁନି ମାମୁଁର ଅଭାବ କେବେହେଁ ହୋଇନାହିଁ ଏହି ଦେଶେ ।

କିଏସେ ଗଦ୍ଦାର ଆମ ମଧ୍ୟେ ଥାଇ ଯୋଗାଉଛି ତାଙ୍କୁ ଭେଦ

ପଦପଦବୀର ସବୁ ମଜା ନେଇ ବଢାଉଛି ତା'ର ମେଦ !!

ଅଧିକାରୀ ସିଏ ଆମରି ଦେଶର ତାଙ୍କ ପାଦର ପାଣ୍ଡୋଇ

ପଇସା ମିଳିଲେ ଦେଶ ବିକିଦେବେ ଯିବେ ଆଣ୍ଠେଇ ଆଣ୍ଠେଇ ।

ଆମ ସେନାଗାଡି ଯିବାର ସମୟ କେଉଁ ରାସ୍ତା ଦେଇ ଯିବ

ନଜାଣିଲେ କିଏ ଆତ୍ମଘାତି ହୋଇ ଖାଲିରେ ପ୍ରାଣ ନାଶିବ !!

ପାକିସ୍ଥାନ ଆମ ଭଗାରୀ ସହଜେ ଚୀନ୍ ତା ପଛରେ ଅଛି

ତାଙ୍କ ସଂଗେ ଲଢି ବରବାଦ ହେବା- ଭିତରେ ଶତୃ ଲୁଚିଛି ।

ଦୁର୍ନୀତି ଅସୁର ଖାଉଛି ଆମକୁ ଏପରି ବିଶାଳ ଶକ୍ତି

ପାକିସ୍ତାନ ତାକୁ ପରାଭବ ଦେବ ଅଡୁଆ ଲାଗୁଛି ଉକ୍ତି ।

ପଇସା ଅୟସ ଖେଳ ଯେଉଁ ଯାଏ କମାଲ ଦେଖାଉ ଥିବ

ଜବାନ ଆମର ଲଢେଇ ନକରି ଶହୀଦ ହେବ ହିଁ ହେବ ।

-ବିଶ୍ୱେଶ୍ଵର ମାଝୀ-