ଅଟକି ଯାଇଛି କଣ୍ଟା

ଘଡି ଆଗେ ବଢି    ସମୟ ସୂଚାଏ

ସେକେଣ୍ଡ ମିନିଟ ଘଣ୍ଟା

କାଳର କରାଳ   ପ୍ରଭାବରେ ଦିନେ

ଅଟକି ଯାଇଛି କଣ୍ଟା ।

ରକ୍ଷଣାବେକ୍ଷଣ   ଥିବା ଯାଏଁ ସିନା

ଘଡି କରେ ନିଜ କାମ

ଦୀର୍ଘକାଳ ଯାଏଁ  ଅବହେଳା କଲେ

ଯନ୍ତ୍ର ହୋଇପାରେ ଜାମ ।

ପରିତ୍ୟକ୍ତ ଏକ  କୋଠରୀ ମଧ୍ୟରେ

ଘଡି ଯେବେ ପଡିରହେ

ଆତଯାତ ବିନା  କାଳ ବ୍ୟବଧାନେ

ଲାଗଇ ଅଳନ୍ଧୁ ବହେ ।

କେଡେ ବିଡମ୍ବନା   ଚାଲୁଥିଲା ଯିଏ

ସମୟକୁ ଦେଇ ତାଳ

ଲାଗଇ ବିଚିତ୍ର   ଚତୁର୍ପାର୍ଶ୍ବେ ଘେରି

ବୁଣିଗଲା କିଏ ଜାଲ ।

ଚେତନା ଜାଗିଲେ   ବିଚ୍ଛିନ୍ନ ସମ୍ପର୍କ

ଯୋଡା ଯାଇପାରେ ଭାଳି

ସମୟ ସାଥିରେ ତାଳ ଦେଇ ଆମେ

ସଭିଏଁ ପାରନ୍ତେ ଚାଲି ।

ସଶରୀରେ କେହି ସାନିଧ୍ୟରେ ଥିଲେ

ଲାଗୁଥାଏ ସିନା ନିଜ

ଦୂରେ ରହିଗଲେ  ସମ୍ବନ୍ଧ ଅଭାବେ

ଅଲୋଡ଼ା ଅମୂଲ୍ୟ ଚିଜ ।

ପରସ୍ପର ପ୍ରତି    ଯତ୍ନ କଲେ ସିନା

ସମ୍ପର୍କ ମଧୁର ରହେ

ଯନ୍ତ୍ର କି ମାନବ  ନଯୋଡିଲେ ଭାବ

ଏମନ୍ତ ଅବସ୍ଥା ସହେ ।