ବହି
ବହି
ଯେତେ ଯାକ ବହି ଏ ସଂସାରେ ରହି
ଏଯାଏଁ ପାରିଛି ଦେଖି
କେତେ ଜ୍ଞାନୀ ଗୁଣୀ ତ୍ଯାଗ ବଳେ ପୁଣି
ଯାଇଛନ୍ତି ସବୁ ଲେଖି ।
ସେସବୁରେ ପରା ବିବିଧତା ଭରା
ସଂଶୟ ନାହିଁ ତ ତିଳେ
ତଥାପି ତ ପଢି ଆଗେ ଗଲୁ ବଢ଼ି
ସଂସ୍କାର ଯହିଁରୁ ମିଳେ ।
ଗଣିତ ବିଜ୍ଞାନ ଇତିହାସ ଜାଣ
ଭୂଗୋଳ ସାହିତ୍ୟ ବୃତ୍ତି
ଯେତେ ଜାଣୁ ଆମେ ଲଗାଇଲୁ କାମେ
ଶ୍ରେଷ୍ଠ ତେଣୁ ଏହି କୃତି ।
ନାନା ବିଦ୍ୟା ଭରା ଆମର ଏ ଧରା
ଅନୁଭବେ ଅନୁସରି
ଭିନ୍ନ ଭିନ୍ନ ଭାଷା ଦେଇପାରେ ଆଶା
ଜୀବିକା ସୁଗମ କରି ।
କାହିଁ ରାଜନୀତି ପାରେ ଗଡ଼ ଜିତି
ସମ୍ଭବ କରାଏ ଅସି
ବହି ମଧ୍ୟେ ଜ୍ଞାନ ପରୀକ୍ଷା ପ୍ରମାଣ
ଭରିପାରେ ସିନା ମସି ।
ବିଦ୍ୟାର୍ଥୀଙ୍କ ପାଇଁ ଜ୍ଞାନ ବାଣ୍ଟେ ଯାଇ
ଶିଖାଏ ବି କେତେ ଭାଷା
ଜାତି ଧର୍ମ ଦେଶ ବର୍ଣ୍ଣ ନିର୍ବିଶେଷ
ମନରେ ଜଗାଇ ଆଶା ।
ଅନୁଭବେ ନିଜ ପୋତା ହୁଏ ବୀଜ
ଅତୀତ କାଳରୁ ଲଭି
ଅତୀତକୁ ଝାଙ୍କି ଦେଇଗଲେ ଆଙ୍କି
ବିଜ୍ଞାନୀ ଗାଳ୍ପିକ କବି ।
ସମାଜ ସଂସ୍କାର ଗୀତର ଝଙ୍କାର
ବିଧି ବିଧାନର ଦୃଷ୍ଟି
ବହିର ଭିତରେ ସଭିଙ୍କ ହିତରେ
ଆଲୋକ ହୁଅଇ ବୃଷ୍ଟି ।
ବହି ସିନା ଥିଲେ ଜ୍ଞାନ ମାର୍ଗ ମିଳେ
ଯାହା ବିନୁ ଆମେ ଅନ୍ଧ
ବିଦ୍ୟା ଅନୁସରି ଅଧ୍ୟୟନ କରି
ଜାଣିପାରୁ ଭଲମନ୍ଦ ।
ପ୍ରସନ୍ନ କୁମାର ମାଦଳା