ବ୍ୟୟବହୁଳ ଶିକ୍ଷା ବ୍ୟବସ୍ଥା
ବ୍ୟୟବହୁଳ ଶିକ୍ଷା ବ୍ୟବସ୍ଥା
ରାଜା ହେଉ ରଙ୍କ ଗୁରୁକୁଳ ଆଶ୍ରମରେ ଶିକ୍ଷା ଲାଭ କରି
ଯୁଦ୍ଧ ବିଦ୍ୟା ଠାରୁ ଆଧ୍ୟତ୍ମ ଚେତନା ସାମାଜିକ ଜ୍ଞାନ ଭରି ।
ନିତ୍ୟ କର୍ମ ସହ ଗୋପାଳନ ପୁଣି ଚାଷ କାର୍ଯ୍ୟ ସଂପାଦନ
ସକଳ କାର୍ଯ୍ୟରେ ନିପୁଣ ହୋଇବା ସମାଜେ ଥିଲା ବିଧାନ ।
ଭେଦଭାବ ହୀନ ସରଳ ଜୀବନ କୃଷ୍ଣଙ୍କ ସହ ସୁଦାମା
ଦ୍ରୋଣାଚାର୍ଯ୍ୟ ସହ ଦୃପଦ ରାଜନ ସମାଜେ ସଫଳ କାମା ।
ଗାଆଁ ଚାଟଶାଳୀ ଗ୍ରାମ ବିଦ୍ୟାଳୟ ଶିକ୍ଷା ଲାଭ କରି ଦିନେ
ସମାଜେ ଜଣେରେ ଗଣା ହେଉଥିଲେ ପୂଜ୍ୟ କୋଣ ଅନୁକୋଣେ ।
ସତ୍ୟବାଦୀର ବନ ବିଦ୍ୟାଳୟ ଶାନ୍ତି ନିକେତନ ପରି
ଶିକ୍ଷାନୁଷ୍ଠାନ ସରଳ ଜୀବନେ ମହତ୍ତର ଚିନ୍ତା ଭରି ।
ଶିକ୍ଷା ବ୍ୟବସ୍ଥା ଜଟିଳ ହୋଇଛି ବେସରକାରୀ ବ୍ୟବସ୍ଥା
ସରକାରୀ ବିଦ୍ୟାଳୟ ଖାଲି ଖାଲି କାହାର ନାହିଁଟି ଆସ୍ଥା ।
ନାମିଦାମୀ ଅନୁଷ୍ଠାନରେ ପିଲାଙ୍କୁ ଭରତି କରିବା ପାଇଁ
ବିଡାବାଡା ଟଙ୍କା ବୋହି ଯାଉଅଛି କାହାର ଶୋଚନା ନାହିଁ ।
ଅଢେଇ ବରଷୁ ପ୍ଲେ ସ୍କୁଲ୍ ପାଇଁ ଲମ୍ବା ଧାଡିରେ ଛିଡା
ଶୈଶବ କୈଶୋର ବନ୍ଧା ପଡୁଅଛି ତାରୁଣ୍ୟ ହୁଏ ଉଜୁଡା ।
ବୋର୍ଡିଂ ସ୍କୁଲର ବେଡିଂ ବନ୍ଧାରେ ପଇସାର ସୁଅ ଛୁଟେ
ପ୍ରାଇଭେଟ ଟିଉଟରିଆଲ ଗାଆଁ ସହରରେ ଛତୁ ଫୁଟେ ।
ପିତାମାତା ଅନୈତିକ ଉପାୟରେ ଅର୍ଥ ଉପାର୍ଜନ ପାଇଁ
ଅଣ୍ଟା ଭିଡନ୍ତି ପିଲାଙ୍କୁ ତାଙ୍କର ଉଚ୍ଚ ଶିକ୍ଷା ଦେବାପାଇଁ ।
ଅର୍ଥଟି ଅନର୍ଥର ମୂଳମନ୍ତ୍ର କାହୁଁ ବା ଯୋଗାଡି ପାରିବ
ପ୍ରତିଯୋଗିତାର ଯୁପକାଷ୍ଠରେ ବଳି ପଡୁଛି ଗରିବ ।
ବିପୁଳ ଅର୍ଥ ବ୍ୟୟ ବରାଦରେ ଶିକ୍ଷା ଲାଭ ଯଦି ହୁଏ
ସଚ୍ଚୋଟତା ଆଶା କରିବା ସପନ ଦୁର୍ନୀତି କି ରୋକି ହୁଏ !!