ବେସୁରା ଗୀତି-୭୦୮

ତୁମେ ପରା ଅଟ ତୃଷିତ ପ୍ରାଣର

ପ୍ରତୀକ୍ଷାର ଶେଷ କଥା

ବର୍ଷା ଗୋ ତୁମେ ପୂର୍ଣ୍ଣ କରିଦିଅ

ଚାତକୀର ମନୋବାଞ୍ଛା  ॥

ବ୍ୟଥା ଭରା କେଉଁ ଅବାଞ୍ଛିତ ପ୍ରାଣେ

ଆଶାର ଆଲୋକ ଜାଳ

ବର୍ଷା ଗୋ ତୁମେ ବିରହୀ ପ୍ରାଣରେ

ପ୍ରୀତିର ବାରି ଢାଳ  ॥

ଜଳି ଜଳି ସରି ଯାଉଥିବା କେଉଁ

ଅସହାୟ ପ୍ରାଣ ପାଇଁ

ବର୍ଷା ଗୋ ତୁମେ ସାହାରା ଦେଇଛ

ଲିଭାଇ ଦେଇଛ ଜୁଇ  ॥

ଆଜି ବୋଧେ କେଉଁ ବ୍ୟଥା ଭରା ପ୍ରାଣ

ମରଣ ଶେଯରେ ଶୋଇ

ଖୋଜିଲା ତୁମକୁ ତାହାରି ପାଇଁକି

ସରଗୁ ଆସିଛ ଧାଇଁ  ॥

ତୁମ ସୁମଧୁର ପ୍ରୀତିର ପରଶେ

ଜୀବନ୍ୟାସ ତାକୁ ଦିଅ

ଅୟୁତ ଯୁଗର ଅବଶୋଷ ତାର

ହରିନିଅ ହରିନିଅ  ॥