ବଡ ଠାକୁରଙ୍କ ବଡଯାତରା
ବଡ ଠାକୁରଙ୍କ ବଡଯାତରା
ଯାଉଛିରେ ଧରି ଭାଇ ଭଉଣୀଙ୍କୁ
ବଡଦାଣ୍ଡେ ବଡ ଗହଳି
ଯାଉଛି କାଳିଆ ଗହଳ ଲଗାଇ
ଆସ ଯିବା ଆସ ଶଙ୍ଖାଳି
ରତନ ବେଦୀରୁ ଜନମ ବେଦୀକୁ
ନଅ ଦିନ ହେବ ଯାତରା
ଧାଡି ପହଣ୍ଡିରେ ଆସିଛି ବିଜେରେ
ଟାହିଆରେ ଟଣା ଓଟରା।
ରେଶମ ରଜ୍ଜୁରେ ରଥ ପରେ ପରେ
ହୁଏ ଟଣା ଭିଡା ଭଣ୍ଡାରା
ବସିବା ହୁଅଂତି ଯେଝା ରଥେ ଯିଏ
ଭକତ ଭାବରେ ଚିତରା
ଗଜପତି ରାଜା କରନ୍ତି ପହଁରା
ତାପରେ ଡାହୁକ ଡାକରା
ବଚନେ ଉଚ୍ଚାଟ ଦେଇ ଥାଟ ବାଟ
ଚାଲୁଥାଏ ରଥ ଘୋଷରା।
ଆଗେ ତାଳଧ୍ଵଜ ତାପରେ ଦରପ
ଦଳନ ପରେ ନନ୍ଦିଘୋଷ
ଘଣ୍ଟ ଘୋର ନାଦ ଦେଉଥାନ୍ତି ବାଦ
ଘଣ୍ଟକେ ଦେଇ ଘଣ୍ଟଘୋଷ
ପ୍ରଭୁଙ୍କର ରୀତି ଭାତୃ ସ୍ନେହ ପ୍ରୀତି
ଭଉଣୀ ଆଦର କରି
ପତ୍ନୀ ଲକ୍ଷ୍ମୀ ଦେବୀ ରହିଥାନ୍ତି ରାଗି
ଅଭିମାନେ ଅଭିହାରୀ
ବଡଶଙ୍ଖ ଯିବେ ବଳଗଣ୍ଡି ଡେଇଁ
ଗୁଣ୍ଡିଚା ଗୁଡିରେ ରହିବେ
ହେରା ପଞ୍ଚମୀରେ ଲକ୍ଷ୍ମୀ ଠାକୁରାଣୀ
ରୋଷେ ରଥ କାଠ ଭାଙ୍ଗିବେ
ଦଶମୀ ତିଥିରେ ବାହୁଡେ କାଳିଆ
ବଡ ଦାଣ୍ଡେ ଭିଡ ପୁରିବ
ବଡ ଏକାଦଶୀ ହେବେ ସୁନାବେଶୀ
ରଥାରୁଢ ରହି ହୋଇବ
ଅଧର ପଣାକୁ ପିଉଥିବେ ଭରି
ପରିଜନ ପୁଷ୍ଟି ପାଇଁ ତ
ବିଶ୍ଵରେ ବିସ୍ମୟ ନୀଳାଦ୍ରି ବିଜୟ
ଭକ୍ତ ଜନ ମନ ଅର୍ଚ୍ଚିତ
ମର୍ତ୍ତ୍ୟରେ ବୈକୁଣ୍ଠ ଲୀଳା ହେଲେ ପୁଷ୍ଟ
ମାନବ ପାଏ ସତଶିକ୍ଷା
ପତିତପାବନ ପତିତ ଜନରେ
ଦେଉଥାନ୍ତି ତୁନ୍ଦ ତିତୀକ୍ଷା।
ପ୍ରଶାନ୍ତ କୁମାର ହୋତା