ସ୍ମୃତି ଫରୁଆରେ ଅତୀତ
ସ୍ମୃତି ଫରୁଆରେ ଅତୀତ
ହୃଦୟର ଏକ ନିଭୃତ କୋଣରେ
ସ୍ମୃତିର ସୁନେଲି ଫରୁଆ ଭିତରେ
ସାଇତି ରଖିଛି ଭାରି ଯତନରେ
ଘଟିଥିଲା ଯାହା କିଛି ଅତୀତରେ l୧l
ବିଗତ ଦିନର ମଧୁର ମୂର୍ଚ୍ଛନା
ଯୋଡି ତା ସାଥିରେ ବିରହ ବେଦନା
ଛଳନା ରହିତ କେତେଯେ ଭାବନା
ମନ ମାନସୀକୁ କରେ ଆନମନା l୨l
ଚଳଚ୍ଚିତ୍ରର ରଙ୍ଗିନ ଛବି ଭଳି
ମାନସ ପଟରେ ଆସୁଛି ଉଛୁଳି
କାଳର ସ୍ପର୍ଶରେ ଯାଇଛି ବଦଳି
ରୂପବର୍ଣ୍ଣ ତାର ଗଲାଣି ମଉଳି l୩l
ସାଥି ମେଳେ କଟିଗଲା ପିଲାଦିନ
କେତେ ରାଗରୁଷା ମାନ ଅଭିମାନ
ନଥିଲା ସେଠି ହିଂସାଦ୍ବେଷର ସ୍ଥାନ
ଆନନ୍ଦରେ କଟି ଯାଉଥିଲା ଦିନ l୪l
ବାଲ୍ୟସଖାଙ୍କ ସଂଗତେ କରି ଗୋଳ
ରଜ ସଜବାଜ ପୁଣି ଦୋଳିଖେଳ
କୁମାର ଉତ୍ସବେ କୁମାରୀଙ୍କ ମେଳ
ଜହ୍ନିଫୁଲ ଗୀତରେ କଟିଲା ବେଳ l୫l
ପ୍ରବେଶକଲା ଯେବେ ଆଦ୍ୟ ଯୌବନ
ଭରିଗଲା କେତେ ନୂଆ ଉନ୍ମାଦନ
ବିଷୟାସକ୍ତ ହୋଇଲା ଏଇ ମନ
ବଦଳାଇ ଦେଲା ଜିଇବାର ମାନ l୬l
ଯୋଜନାର ରୂପ ରେଖକୁ ସଜେଇ
ଆକାକ୍ଷାଂର ନୂଆ ସୌଧ ଗଢେଇ
ବାସ୍ତବ ଦୁନିଆଁ ଠାରୁ ମୁଁ ଦୂରେଇ
ରହିଲି ଅଲଗା ସଂସାର ବନେଇ l୭l
କର୍ତ୍ତବ୍ଯ ପଥରେ ହେଲି ଅଗ୍ରସର
ବଦଳି ଗଲା ଦିଶା ମୋ ଜୀବନର
ଅଚିହ୍ନା ଅଜଣା ହେଲେ ଆପଣାର
ବନ୍ଧୁତାରେ କଲି ସଭିଙ୍କୁ ନିଜର l୮l
ମାୟା ମରିଚିକା ପଛରେ ଗୋଡେଇ
ଲୋଭବଶେ ନିଜ ଅସ୍ତିତ୍ବ ଭୁଲେଇ
ମିଛ ମୋହଅହଂକାରେ ଅନ୍ଧ ହୋଇ
ପାରି ହେଉଥିଲି ଜୀବନର ନଈ l୯l
ମୋହଭଙ୍ଗ ହେଲା ସତ୍ୟକୁ ବୁଝିଲି
କାମନା ବାସନା ମନୁ ପାସୋରିଲି
ମନୁଷ୍ୟ ଜନ୍ମରୁ ନିସ୍ତରିବି ବୋଲି
ବିଭୁକୃପା ପାଇଁ ମନ ବଳେଇଲି l୧୦l