निशाणा

लक्ष्य तुझ्यासमोर आहे 

चुकवू नको तुझा निशाणा

नेम धरून सोड बाण

जिंकला तरच तू खरा राणा

प्रत्येक वळणावर तुला हीच

भाषा ऐकायला मिळणार आहे

प्रत्येक परीक्षेत तुला हेच

कार्य करावे लागणार आहे

बालपणापासून शिक्षण संपेपर्यंत

पदोपदी यशच मिळवायचं आहे

अपयश कधीच येऊ नये म्हणून

सतत आपला लक्ष्य ठेवायचं आहे

याच दबावाखाली अनेक मुलं

अक्षरशः दबले जात आहेत

दबाव सहन झाले नाही तर 

स्वतःचे जीवन संपवित आहेत

त्यांच्या आवडीनुसार शिकू द्या

यातच खरे त्याचे लक्ष्य असते

हेच कर तेच कर म्हटल्याने

मुलांचे खूपच हाल बहाल होते

मुलांना निशाण्यावर न धरता

त्यांचा निशाणा त्यांना ठरवू द्या

आवडीने अभ्यास करतील अन

आपला आनंद त्यांना मिरवू द्या