સૂરજનું કંઈક કરવું છે
સૂરજનું કંઈક કરવું છે
આજે તો વાદળ ઓઢીને ફરવું છે
મારે આ સૂરજનું કંઇક કરવું છે
કાળઝાળ કારમી ગરમી વરસાવે
ને બુંદ બુંદ પાણી માટે તરસાવે
હવે મોરના પીંછા બની ખરવું છે
મારે આ સૂરજનું કંઈક કરવું છે
આંખો લાગે તેની અગ્નિની જ્વાળા
દિવસ આખો ઓકે આગના ગોળા
હવે ઝાંઝવાનાં સાગરમાં તરવું છે
મારે આ સૂરજનું કંઈક કરવું છે
ચંન્દ્ર સંતાય આભની ભીતર
તારલાય લાગે પસીને તરબતર
ઠંડા બરફ જેવા સ્વપ્નમાં સરવું છે
મારે આ સૂરજનું કંઈક કરવું છે
પંખીઓ બધા માળામાં લપાયા
માણસો પણ ઘરોમાં છુપાયા
એને આઇસ્ક્રીમ જેવું 'જશ' ધરવું છે
મારે આ સૂરજનું કંઈક કરવું છે
આજે તો વાદળ ઓઢીને ફરવું છે
મારે આ સૂરજનું કંઈક કરવું છે