Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Panchanan Jena

Others


4.0  

Panchanan Jena

Others


ହଳଦୀପତ୍ର ପିଠା

ହଳଦୀପତ୍ର ପିଠା

5 mins 262 5 mins 262

ଜେନାବାବୁ ନବୋଦୟ ବିଦ୍ୟାଳୟ ,ୟାନମ, ପୁଦ୍ଦୁଚେରୀରେ ଅଧୁନା କାର୍ଯ୍ୟରତ | କୌଣସି ଏକ କୁହୁଡିବଳୟରେ ଘେରା ଶୀତ ସକାଳ | ଚେନା ଚେନା ସୂର୍ଯ୍ୟ କିରଣ କୁଝ୍ହଟିକାର ବକ୍ଷ ଚିରି ବିଞ୍ଚି ପଡୁଛି ଘଞ୍ଚ ନାରିକେଳ ପତ୍ର ଗହଳରୁ |ଅନାମଧେୟ ବିହଗ-ବିହଙ୍ଗମ ଗୋଷ୍ଠୀର କଳରବ ଶୁଭ ସକାଳର ଆବାହନୀ ସଙ୍ଗୀତ ପ୍ରାୟ ପ୍ରତୀତ ହେଉଛି | ଦ୍ଵିତୀୟ ପିରିଅଡ ପରେ ପରେ ପୁସ୍ତକାଳୟକୁ ପଶୁ ପଶୁ ଲାଇବ୍ରେରିଆନ ଲତା ମ୍ୟାଡାମ ଜେନା ସାରଙ୍କୁ ଦେଖନ୍ତେ କହି ପକେଇଲେ –


“ସାରେ ! ଏଇଟା ପଢନ୍ତୁ ଏବଂ ପରେ ମୁଁ ଗୋଟିଏ କଥା କହିବି | “ Down to Earth “ ମ୍ୟାଗାଜିନ ଟି ବଢେଇଦେଲେ ଜେନା ସାରଙ୍କ ହାତକୁ | ବାଙ୍କୁଲି ଚନ୍ଦ୍ରର ସ୍ମିତହାସ୍ୟ ଭଳିଆ ଚେନାଏ ହସ ଫୁଟେଇଦେଇ ଚୁପ ଚାପ ଇଜି ଚଉକିରେ ବସିପଡିଲେ ଚିରାଚରିତ ଢଙ୍ଗରେ ପୁସ୍ତକାଳୟ କକ୍ଷ୍ୟରେ |


ସାର ଡାହାଣ ହାତରେ ମ୍ୟାଗାଜିନ ଟା ନେଉ ନେଉ କେତେ କଣ ଭାବିଗଲେ | ମନରେ ଇନ୍ଦ୍ରିୟରେ କେତେ କଥା ସବୁ ଉଦଣ୍ଡି ସୀତା ଭଳିଆ ଆତଯାତ ହେଲେ |


କିଛି ଷ୍ଟାଇକିଙ୍ଗ ଡ଼ିସକଭରିର ଖବର କି ?କିଛି ବିଜ୍ଞାନ ସମ୍ମତ ନୂତନ ନବୀନ ଖୋଜ ଖବର କି ? କିଛି ହିଷ୍ଟୋରିକାଲ ଏକ୍ସକେଭେସନ ବା ଏକ୍ସପ୍ଲୋରେସନର ନୂଆ ପ୍ରାସଙ୍ଗିକ ଡାଟା କି ? ହରପା ସଭ୍ୟାତାର ଲିପି ଯାହା ଆଜିପର୍ଯ୍ୟନ୍ତ ପଢା ହୋଇପାରିନଥିଲା ତାର କିଛି ସୁରାଗ ସମ୍ବନ୍ଧୀୟ ତଥ୍ୟ କି ? କାରଣ ଜେନା ବାବୁ ଇତିହାସର ଶିକ୍ଷ୍ୟକ | ତେଣୁ ଐତିହାସିକ ପୃଷ୍ଠଭୂମିରେ ଭାବିବସିଲେ |


ଆଖି କିନ୍ତୁ ଟାଣି ହୋଇ ଯାଉଥାଏ ମ୍ୟାଗାଜିନର ପୃଷ୍ଠା ଉପରକୁ | ଆରମ୍ଭରୁ ଶେଷ ପର୍ଯ୍ୟନ୍ତ ଥରେ ଉଲଟାଇଦେଲେ | ଏକ ଅହେତୁକ ଉତ୍ସୁକତା ଆଉ ଶିଶୁ ସମ ଜିଗୀଷାର ଉନ୍ମାଦନା ତାଙ୍କୁ ଆବୋରି ଥାଏ | ମ୍ୟାଡାମ ନିହାତି କିଛି ତାଙ୍କ ଉପଯୋଗୀ ତଥ୍ୟ ଦେଖିଥିବେ ଆଉ ସାନ ଭାଇ ହିସାବରେ କାମରେ ଆସିବା ନ୍ୟାୟରେ ସରାଗରେ ମୋତେ ଦେଲେ | କିନ୍ତୁ କାହିଁ ? ସେମିତି କିଛି ଆଖି-ଦୃଶିଆ ଫୋଟୋ-ଫ୍ରେମିଆ କାଟୋନ-ସାଙ୍ଗିଆ ଦୃଷ୍ଟିଗୋଚର ହେଲାନି | ଏପ୍ରିଲ ଫୁଲ ତ ନୁହଁ ? ଷ୍ଟାଫ ରୁମ କାନ୍ଥରେ ଟଙ୍ଗା କ୍ୟାଲେଣ୍ଡରକୁ ଦେଖିଲେ ଆଉ ଆଶ୍ଵସ୍ଥ ହେଲେ କି ମାସତ ଡିସେମ୍ବର |


ସେମିତି କିଛି ଆଖି ଗୋଚର ହେଲାନି | ମନ ତ ମାନୁ ନ ଥାଏ  | ଲତା ମ୍ୟାଡାମଙ୍କର ଆଉ ସେବାନିବୃତ୍ତିକୁ ମାତ୍ର ବର୍ଷେ ବାକି ଅଛି | ସେ ତ ସବୁବେଳେ ଗୁରୁଗମ୍ଭୀର | ବୟସର ପରିପକ୍ଵତା ଈଷତ ପାଚିଲା କେରା କେରା କିଛି ବାଳ ସୁଚେଇ ଦେଉଥାଏ | ମଜା ଥଟ୍ଟା ତାଙ୍କ ପାଖ ତ କେବେ ମାଡ଼େନି | କମେଡି ସହିତ ତାଙ୍କର କଟଟି |ଏମିତି ଭାବୁ ଭାବୁ ଝିଭ କାମୁଡି ପକେଇଲେ ସାରେ | କି ବେକାରିଆ ଲୋକ କେଜାଣି ମୁଁ | ଧେତ ତେରିକା | ଆଲ ଇଜ ୱେଲ || ଆଲ ଇଜ ୱେଲ |


ପୁଣି ସୂଚୀପତ୍ରରୁ ଆଉ ଥରେ ଆଖି ପକେଇଲେ | ଦେଖିଲେ ଓଡିଶା କୁଳିନାରୀ ସ୍ପେଶିଆଲ ୩୫ ପୃଷ୍ଠାରେ ଶ୍ରୀମତୀ ସ୍ନିଗ୍ଧା ଦାଶଙ୍କର ହଳଦୀପତ୍ର ପିଠା ଶୀର୍ଷକ ଆର୍ଟିକିଲ ବାହାରିଛି |


ନିଜକୁ ସମ୍ଭାଳିପାରି ନ ଥିଲେ ସେଦିନ | ପ୍ରୁଷ୍ଠାର ଫଡ ଫଡ ଭିତରେ ଉଲଟେଇ ଚାଲିଥିଲେ | ଦେଖିଲେ ଇଂରାଜୀରେ ଏକ ରୂଚିପୂର୍ଣ ଆଲେଖ୍ୟ ହଳଦୀପତ୍ର ପିଠା ସଚିତ୍ର ସହିତ ବିଦ୍ୟମାନ |ପ୍ରତ୍ୟେକ ପ୍ରବାସୀ ଓଡିଆ ମାନଙ୍କ ପାଇଁ ଶୀତସକାଳର ଜେଜେମା- ମା’-ମାଉସୀଙ୍କ ହାତତିଆରି ହଳଦୀପତ୍ର ପିଠା ଆହେତୁକ ଆକର୍ଷଣ ସାଜିଥାଏ |ପିଠାର ସୁଗନ୍ଧ ଆଉ ମିଠାସ ସହିତ ମା’ ହାତର ସ୍ନେହବୋଲା ପରଶ ପିଠାକୁ ଆହୁରି ରସମୟ କରିଥାଏ | ବାଲ୍ୟ କୈଶୋରର ସେହି ପ୍ରଥମାଷ୍ଟମୀ ପର୍ବ ପାଳନ ଦିନ ହେଉ ଅବା ଶୀତ ଦିନରେ ଯେ କୌଣସି ଦିନ ହଳଦୀପତ୍ର ପିଠାର ହଳଦି ଗୁରୁ ଗୁରୁ ହଳଦିଆ ବାସନା ସମସ୍ତ ଚିନ୍ତା-ଚେତନାକୁ ସମଗ୍ର ମନ-ମଗଜକୁ ସମ୍ପୂର୍ଣ ହୃଦୟ-ତନ୍ତ୍ରୀକୁ – ମଜ୍ଜା- ମସ୍ତିସ୍କକୁ ଏକ ନୂଆ ସମ୍ମୋହନୀ ମାଦକତାରେ ଭରିଦିଏ |


ତଳକୁ ଦରକାରୀ ସାମଗ୍ରୀର (ingredients )ଏକ ସୁବିସୃତ ସୂଚୀ ସହିତ ଫୋଟୋରେ ଉଲ୍ଲିଖିତ –

୧. କଞ୍ଚା ହଳଦୀପତ୍ର -୨୦ ଟି 

୨. ଅରୁଆ ଚାଉଳ ଚୁନା – ୨୫୦ ଗ୍ରାମ 

୩. ରଗଡା ବିରି ଡାଲି ( Urad )- ୫୦୦ ଗ୍ରାମ 

୪. ନଡିଆ କୋରା – ୨୫୦ ଗ୍ରାମ 

୫. ଆଖୁ ଗୁଡ – ୨୦୦ ଗ୍ରାମ 

୬. ଲୁଣ – ଏକ ଚାମୁଚ 

୭. ଅଳେଇଚ – ୩ ଅବା ୪ ଟା 

୮. ବଟା ଅଦା – ୧୦ ଗ୍ରାମ 

ଏମିତି ତଳକୁ ତଳ ପଢୁ ପଢୁ ସାରଙ୍କ ମନକୁ ହଳଦୀ ପତ୍ରଘଡା , ହଳଦୀ ପତ୍ରମୋଡା , ହଳଦୀ ପତ୍ରମଣ୍ଡା ପିଠାର ଅବଏବ ମନକୁ ଆପେ ଆପେ ଆସିଲା | ଆଉ ତଳକୁ ପଢିବାକୁ ପଡିଲାନି | ମନକୁ କିଛି ଜୀବନ୍ତ ଚିତ୍ର ପରିକା , ଚଳଚିତ୍ରର ଫ୍ଲାସବ୍ୟାକ ଭଳିଆ କିଛି ଉଙ୍କି ମାରିଲା | ସବୁ ଡଗ ଡ଼ଗ ହୋଇ ଗୋଟି ଗୋଟି ହୋଇ ମାନସ ପଟଳରେ ଉବୁଟୁବୁ ହେଲେ ଆତଯାତ ହେଲେ | ସେହି ମହିମାମୟି ଜେଜେମା ଠାକୁମା ବୁଢୀମାର କମନୀୟ କାନ୍ତି ସହିତ ହସ ହସ ମୁହଁଟି ଭାସି ଉଠିଲା ସାମନାରେ .


 ଜେଜେମା ବୁଦ୍ଧିମଣୀ ଦେବୀ ଆଜକୁ ଦୀର୍ଘ ୩୦ ବର୍ଷ ତଳୁ ଆରପାରିକୁ ଗଲେଣି |ମାତ୍ର ପ୍ରଥମାଷ୍ଟମୀ ଦିନ ପଢୁଆଁ ଦିନ ତା’ର ହାତ ତିଆରି ହଳଦୀପତ୍ର ପିଠାର ସୁଆଦ –ମିଠାସ ଆଜି ବି ବାରି ପାରିଲେ | ନିଜ ଅଜାଣତରେ ହାତକୁ ବି କେତେଥର ଶୁଙ୍ଘି ପକେଇଲେଣି |


ପ୍ରଥମାଷ୍ଟମୀର ପୂର୍ବ ଦିନ ରାତିରୁ ବୁଢୀମା ଆଉ ଶୁଇବନି | ଉଆଚାଉଳକୁ ପାଣିରେ ବତୁରି, ଢିଙ୍କିରେ ଚୂନା କୁଟି, ଚାଲୁଣିରେ ଚଳେଇ ,ନଡିଆ କୋରି , ଆଖୁ ଗୋଡକୁ ପାଗ ଧରେଇ , ସବୁ ସରଞ୍ଜାମକୁ ମିଶେଇ ଗୋଳେଇ , ମାଟି ହାଣ୍ଡିରେ ଚୁଲିରେ ବସେଇ , ଖଳି ବାହାର କରି , ପୁର ତିଆରି କରି ,ତାତିଲା ଖଳିକୁ ହାତରେ ଗୋଳା କରି, ଗୋଳା ମଝିରେ ପୁର ପୁରେଇ , ହଳଦୀପତ୍ରରେ ଗୋଡେଇ ପୁଣି ହାଣ୍ଡିରେ ସିଝେଇ ଗରମ ଗରମ ହଳଦୀପତ୍ର ପିଠା ସକାଳୁ ସକାଳୁ ଆମକୁ ଖାଇବାକୁ ଦେବ | ପ୍ରଥମେ ପଢୁଆଁ ମୋ ବଡ ଅପା ପାଗିଳି ଅପା (ରେବତୀ) ନୂଆ ଜାମା ପିନ୍ଧି ଠାକୁର ପାଖରେ ମୁଣ୍ଡିଆ ମାରି ପ୍ରଥମେ ହଳଦୀପତ୍ର ପିଠା ଖାଇବ | ଆମେ ଅନ୍ୟ ଚାରି ଭାଇ ଭଉଣୀ ଅଭାଗା ଭଳିଆ ଚାହିଁ ବସିଥିବା କେତେ ବେଳେ ଅପାର ପୂଜା ପରବ ନୂଆ ଜାମା ପିନ୍ଧା ପରବ ସରିବ | ସେଦିନ ଲାଗେ ଅପା ଆମର ପ୍ରଥମେ ଜନ୍ମ ହୋଇ ଗୋଟେ ଗଡ ଜିତି ନେଇଛି |ପିଠା ଖାଇ ବାପା ସାଙ୍ଗରେ ଝୁଲେ ହଳଦୀପତ୍ର ପିଠା ଧରି ରୁକ୍ମିଣୀ ପିଉସୀ ଘରକୁ ଯାଉ | ସେହି ବାଲ୍ୟ କୈଶୋର ବିଗତ ଦିନର ସ୍ମୃତିସବୁ ଉଙ୍କିମାରିଲା |


ବୁଢୀମା’ର ବଳେଇ ବଳେଇ ହଳଦୀପତ୍ର ପିଠା ଖୁଏଇବା ,ଚିନି ବା ଗୁଡ ସହିତ ଆଉ ସାଙ୍ଗରେ ନଡିଆ କୋରା ମେଞ୍ଚେ ମେଞ୍ଚେ ଥାଳି ପାଖରେ ପକେଇଦେବାର ନିଆରା ସ୍ନେହ –ବୋଳା ପରଷକୁ ମନେ ମନେ ଅନୁଭବ କରନ୍ତେ ଆଖିକୋଣ ଜକେଇ ଆସିଲା | ଆଖି-ନଦୀରେ ବନ୍ୟା ଆସିବାର ଆଭାସ ଦସ୍ତକ ଦେଲା କିନ୍ତୁ କୂଳ ଲଂଘିବା ଆଗରୁ ଜେନା ବାବୁଙ୍କ ରୋମାଲ ତା’ ଉଜାଣି ଶ୍ରୋତକୁ ପୋଛି ପକେଇଲା | 

ବୁଢୀ ମା’ର ହସ ହସ ମୁଁହ –ପାନଖିଆ ପାଟି –ରୂପା ପରି ଚକଚକ ଦାନ୍ତ ସବୁ – ଆକାଶିଆ ଉଢଣାରେ ଢଙ୍କା ତା’ର ଗୋରା ଗୋରା ତକତକ ହସିଲା ପୁରିଲା ମୁଁହକୁ ଯେମିତି ସେ ଦେଖିପାରିଲେ | ବାଲ୍ୟ ଜୀବନର ପେଡି ଖୋଲିଗଲା ପରି କେତେ କଥା-ନଥା ସବୁ ଧାଡି ଧାଡି ହୋଇ ଆଖି ଆଗରେ ଚାଲି ବୁଲିଲେ |


ସ୍ନେହ କାଙ୍ଗାଳି ଜେନା ବାବୁ ! ଆଜିର ଏ ମହରଗ ବସ୍ତୁବାଦୀ ବଜାରମାର୍ଗୀ ଦୁନିଆରେ ସବୁ କିଣିଲେ ମିଳେ | କେବଳ ମିଳିବନି ଜେଜେମାର ବୁଢୀମାର ଆକାପଟ୍ୟ ସ୍ନେହିଳ ପରଶ , ଅମୃତ ଧାରାସମ ଆଶୀର୍ବାଦର କଳସ , ବଳେଇ ବଳେଇ ଖୁଆଇବାରେ ସରସ , କିଛି ନ ମାଗି ସବୁ ଦେଇଦେବାରେ ସହର୍ଷ .........|


ହଠାତ ସ୍କୁଲ ଛୁଟିର ଘଣ୍ଟି ବାଜିଉଠିଲା ଟିଙ୍ଗ-- ଟିଙ୍ଗ – ଟିଙ୍ଗ | ବିଦ୍ୟାଲୟ ପିଅନ ବିଜୟଲକ୍ଷ୍ମୀ ମ୍ୟାଡାମ ତାଙ୍କର ଚିରାଚରିତ ଢଙ୍ଗରେ ଘଣ୍ଟି ବଜେଇଦେଇ ପିଲାମାନଙ୍କ ହସୁଆ-ଖୁସିଆ ଚେହେରାକୁ ଦେଖୁଥିଲେ ଆଉ ନିଜେ ଆପେ ଆପେ ନିଜ ଅଜାଣତରେ ବି ଟିକେ ମୁରୁକି ଦେଉଥିଲେ |


ଜେନା ବାବୁ ମଧ୍ୟ ହସ ହସ ଲାଗୁଥିଲେ | ସକାଳର ଅଳସୁଆମୀର ଚିହ୍ନବର୍ଣ ନାହିଁ | ମ୍ୟାଗାଜିନରେ ଆର୍ଟିକିଲ ହଳଦୀପତ୍ର ପିଠା ପଢି ପ୍ରଥମାଷ୍ଟମୀ ଆଉ ବୁଢୀମା’ର ସୁବାସିତ ସୁଗନ୍ଧିତ ହଳଦୀପତ୍ର ପିଠାର ମିଠାସକୁ ମନେପକେଇବାକ୍ଷଣି ଅଳସୁଆ ମାନ୍ଦା ଅବସ୍ଥା କୁଆଡେ ମନ-ମଗଜରୁ ଉଭାନ ଫେରାର |


ହଠାତ ମନେ ପଡିଲା ଲତା ମ୍ୟାଡ଼ାମ ଆଉ କିଛି କହିବେ ବୋଲି କହୁଥିଲେ ଆଉ ଅଧରରେ ସ୍ମିତହାସ୍ୟର ଛଟା ଓଡିଆ ଘରର ଓଡିଶା ପଦେଶର ହଳଦୀପତ୍ର ପିଠା ଖୁଏଇବାର ଦୁର୍ବାର ଅଭିପ୍ରାୟକୁ ଉଜାଗର କରୁଥିଲା | ମ୍ୟାଡ଼ାମ ଡାଇନିଙ୍ଗ ହଲରେ ଥିବେ | ତାଙ୍କୁ ସେଠାରେ ଧନ୍ୟବାଦ ସହିତ ପିଠା ଖାଇବାର ନିମନ୍ତ୍ରଣ ଆମନ୍ତ୍ରଣ କରିଦେଲେ ଅବଶ୍ୟ ଭଲ ହୁଅନ୍ତା |


ଏମିତି ଏକ ଭାବନାର ଫେଣ୍ଟାଫେଣ୍ଟି ଚିନ୍ତାକଳ୍ପକୁ ମନରେ ଧରି ସ୍କୁଲ ହତାରୁ ବାହାରକୁ ଆସିଲେ |ଅଧୁନା ସବୁ ହସ ହସ ତରୁଳତା ଗଛପତ୍ର ପୁଷ୍ପଫଳ ତାଙ୍କୁ ଯେମିତି ଖୁସିରେ ଚାମର କରୁଥାନ୍ତି ପବନରେ ଢଳି ଦୋହଲି ଆରତୀ ମୁଦ୍ରାରେ ଓଡଶୀ ନର୍ତ୍ତକୀ ପରି |ସସାଗରା ଧାରା ତାଙ୍କୁ ସେହି ମଧୁମୟ ମହିମାମୟ ସୃଷ୍ଟିର ଫୁଟିତ ପୁଷ୍ପିତ ସୁଗନ୍ଧିତ ବୋଲି ଲାଗୁଥାଏ |


ଝୁଣ୍ଟି ପଡିଲେ ସାର | ଜୋତା ନଡିଆ ଫଳ ଉପରେ ନିଜ ଅଜାଣତରେ ଚାପି ହୋଇଯିବାରୁ ତଳେ ପଡୁ ପଡୁ ସମ୍ଭାଳି ନେଲେ |ଦାନ୍ତ କାମୁଡି ପକେଇଲେ ସାରେ |କିନ୍ତୁ ଲାଗିଲା କିଛି ଅସୁବିଧା ହେବ କି ? ଜେଜେମାର ରିଷ୍ଟ କଟିଗଲା କଥା ମନକୁ ଆସିଲା |


ମୁଁ ତ ଘରେ କହିନି | ହଳଦୀପତ୍ର ପିଠା କଥା ଶ୍ରୀମତିଙ୍କୁ ବିନ୍ଦୁ ବିସର୍ଗ ନ ଜଣେଇ ଯଦି ଲତା ମ୍ୟାଡ଼ାମଙ୍କୁ ଅଗତ୍ୟା ନିମନ୍ତ୍ରଣ କରିଦେଇଥାନ୍ତି “ଆ ବଳଦ ମୋତେ ବିନ୍ଧ “ନ୍ୟାୟରେ ଛୋଟକାଟିଆ ଝିମିଟି କଳି –କଜିଆ – ମୁଁହ ଫୁଲା-ଫୁଲି ରାଗ-ରୋଷର ଏକ ଗୀତିନାଟ୍ୟର ଆସର ହୋଇଥାନ୍ତା ଆଜି | ଯାହା ହେଉ ବଞ୍ଚିଗଲି | ଜୟ ନଡିଆ ଫଳ |ଜୟ ଜେଜେମା ବୁଢୀମା ଠାକୁମା |ଜୟ ଜଗନ୍ନାଥ ସ୍ଵାମୀ ନୟନପଥଗାମୀ ଭବ ତୁମେ |


ମୁଣ୍ଡ ଉଠେଇ ଦେଖିଲେ ଲୋଟଣି ପାରା ଯୋଡିଏ ଫଡ ଫଡ କରି ଉଡି ଉଠିଲେ | ୟାନମର ରୌଦ୍ର ତାପ ପାରାର ଘୁମୁର ଘୁମୁର ମୂର୍ଚ୍ଛନା ସହିତ କେମିତି ଏକ ସୁଖାନ୍ତକ ନାଟକର ପରିସମାପ୍ତିର ସୂଚନା ଦେଉଥିଲା |


Rate this content
Log in