ଯାଚି ଦିଅ ସଦାଶିବ

ଜଟାରୁ ତୁମର ଝର ଝର ହୋଇ

ଗଙ୍ଗା ଯାଉଅଛି ଝରି ,

କଳ କଳ ନାଦେ ଜଗତଜନଙ୍କ 

କଳୁଷ ନେଉଛି ହରି ।

ଡମ ଡମ ନାଦେ ଡମ୍ବରୁ ବାଜିକି

ଶୁଣାଏ ଅଭୟ ଘୋଷ ,

ଧର୍ମ ସଂସ୍ଥାପନ ସକାଶେ ତ୍ରିଶୂଳ 

ପାପୀ ଯେତେ କରେ ନାଶ ।

ନନ୍ଦୀ ,ଭୃଙ୍ଗୀ ତାଙ୍କ ଶକ୍ତି ପ୍ରକାଶନ୍ତି

ଶିବଗଣ ସହିତରେ ,

ମାଆ ଜଗତର କଲ୍ୟାଣ ସକାଶେ

ଓହ୍ଲାଅନ୍ତି ମରତରେ ।

ମହାଯୋଗୀ ତୁମେ ଯୋଗରେ ମଗନ

ଏ ବିଶ୍ବ କଲ୍ୟାଣ ପାଇଁ ,

ଅଳପରେ ତୋଷ ହୋଇ ହେ ମହେଶ

ଭକ୍ତ ପାଶେ ଆସ ଧାଇଁ ।

ନିମିଷକେ ତୁମେ ଲଲାଟ ଲେଖାକୁ

ବଦଳେଇ ଆହେ-ଦେବ ,

ଦୁଃଖ ହରି ନେଇ ସୁଖ ଆଉ ଶାନ୍ତି

ଯାଚି ଦିଅ ସଦାଶିବ ।