ତୁମରି ଗାଁ- ୨୧
ତୁମରି ଗାଁ- ୨୧
ତୁମଗାଁ ଆକାଶେ ତାରାଫୁଲମେଳେ
ଜହ୍ନ ଆସିଲେ ଉଇଁ ,
ଭାବନାର ଢେଉ ହୃଦୟ ତଟକୁ
ଯାଉଥାଏ ଛୁଇଁଛୁଇଁ ।
ମନ-ଏକତାରା ବାଜିଉଠେ ଆପେ
କଣ୍ଠୁ ଝରଇ ଗୀତ,
ମରମ-ବୀଣାରେ ଝଙ୍କୃତ ହୁଏ
ମଧୁ ମୂର୍ଚ୍ଛନା ସେତ ।
ଅଭିନବ ଆଉ ଭାରି ଅନୁପମ
ଜୀବନ ଲାଗଇ ସତେ,
ଜିଜ୍ଞାସା ମୋର ବଢିବଢିଯାଏ
ସେଇ ଚାନ୍ଦିନୀ ରାତେ ।
ଛାପିଛାପିକା ସେ ବୃକ୍ଷଗହଳେ
ଜ୍ୟୋତ୍ସ୍ନାର ପରିପାଟୀ,
ଲାଗଇ ଧବଳ ପୁଷ୍ପ ମେଞ୍ଚାଏ
ଦେଇଛି କିଏବା ଛାଟି ।
ମଞ୍ଚା ଉପରେ ଜହ୍ନି ଫୁଲର
ସମୀର ସନ୍ତରଣ,
ଶୁଭିଯାଏ ପୁଣି ବାସ୍ନା ବିଭୋର
ମଧୁପର ଗୁଂଜନ ।
କାହିଁ କ୍ରୀଡାରତ ଶିଶୁ ମାନଙ୍କର
ଶୁଭଇ ହାସ୍ୟରୋଳ,
ସଂଚରି ଆସେ ଦିବ୍ୟ ଭାବନା
ବଢିଯାଏ ମନବଳ।
ଶିରିଶିରି ବାଆ ଥିରିଥିରିବହି
ସୁଗନ୍ଧ ବିତରୁଥିଲା,
ସେ ଅତୀତ ଆଜି ଅକ୍ଷାଂଶ ଦ୍ରାଘିମା
ସ୍ମୃତି ପଟଳରେ ହେଲା।
* * *
କୈଳାସ ଚନ୍ଦ୍ର ପାଢୀ। କୁମାର ପୁର।
ଭଦ୍ରକ।
-----------------------