ସୁନେଲି ସ୍ବପ୍ନ

ସାରା ସହରଟା ଘନ କୁହୁଡିର

ଚାଦର ତଳେ ଘୋଡେ଼ଇ ହେଲା ପରେ

ତମେ ଆସ ପାଦ ଚିପି ଚିପି

ଚୁପ୍ ଚାପ୍

ମୋ ଅଲକ୍ଷ୍ୟରେ 

ମୋତେ ନିରେଖି ଦେଖୁ ଥାଅ

ଏତେ ଥଣ୍ଡାରେ ଵି

ମୋ ମୁହଁରେ ଥିବା ଟୋପା ଟୋପା

ଝାଳ ବିନ୍ଦୁକୁ ପୋଛି ନିଅ

ତୁମ ଉଷୁମ ସ୍ପର୍ଶରେ

ନିଦ ଭାଙ୍ଗିବା ଆଗରୁ ସନ୍ତର୍ପଣରେ ଚାଲିଯାଅ

ହେଲେ କାହିଁକି!

ମୁଁ ତୁମର କିଏ ?

ମୋ ପାଇଁ ତମ ଭିତରେ 

ଏତେ ଆଲୋଡନର କାରଣ

ଖୋଜିବାକୁ ଯେତେ ଚେଷ୍ଟା କଲେ ବି

ମୁଁ ହାରିଯାଏ

ଅଦେଖା ଅଚିହ୍ନା ଲୋକଟା

ମନ ଭିତରକୁ ଝାଙ୍କିବା କ'ଣ 

ଏତେ ସହଜ କଥା!

ନା ମୋ ଦେଇ ହୁଏନା।

ଅଥଚ ତମେ କେମିତି କରିପାର 

ଏସବୁ ନିର୍ବିଘ୍ନରେ

ତମେ କଣ ଜାଣନି ଯଦି

ଧରା ପଡିଯାଅ କାହା ହାତରେ

ତେବେ ଅନୁପ୍ରବେଶକାରୀ ବୋଲି

ଧରି ନିଆଯାଇ ତୁମକୁ

ଦିଆଯାଇପାରେ ଆଜୀବନ କାରାଦଣ୍ଡ