ସପନର ରାଣୀ
ସପନର ରାଣୀ
ସପନର ରାଣୀ ହୃଦୟ ସଙ୍ଗିନୀ
ନିଶାର୍ଦ୍ଧ ରାତିରେ ଆସେ ,
ସରାଗ ମନରେ ପ୍ରୀତିନୀର ଢାଳେ
ମନ ଭାବନାରେ ଭାସେ ! !
ସପନ ନାୟୀକା ସ୍ମୃ୍ତି ଅନାମିକା
ଠିକଣା ଅଜଣା ମୋତେ ,
ହୃଦୟ ଭିତରେ ରହିଛି ସତରେ
ଭଲପାଏ ମୁଁ'ଯେ କେତେ ! !
ସ୍ଵପ୍ନ ବିଭୁଷିତ ମନ ପ୍ରାଣ ଚିତ୍ତ
ପ୍ରେମ ଛବି ଆଙ୍କେ ନିତି ,
ପ୍ରେମ ଫଗୁରଙ୍ଗ ସାଜିଛି ମୋ' ସଙ୍ଗ
ଉଦ୍ଭାସିତ ହୁଏ ସ୍ମୃ୍ତି ! !
ସପନ ନିଦରେ ମନ ହଜିଯାଏ
ପ୍ରେମ ପରଶରେ ଭିଜି ,
କାହିଁକି କେଜାଣି ଏମନ ବୁଝେନି
ଆଶଙ୍କାରେ ଉଠେ ଗର୍ଜି ! !
ଭିଜା ଭିଜା ସ୍ଵପ୍ନ ବିରହରେ ପୂର୍ଣ୍ଣ
ଏକଥା ଜାଣିଛି ପ୍ରେମୀ ,
ତଥାପି ଭୁଲେନି ସାଜେ ସ୍ଵପ୍ନ ସାଥୀ
ପ୍ରେମର ଉଦ୍ଦାମ କର୍ମୀ ! !
ପ୍ରେମରେ ସଦିଚ୍ଛା ମୋର ମନବାଞ୍ଛା
କେତେ ସତ କେତେ ମିଛ ,
ପ୍ରେମର କୁହୁକ ସପନର ମିତ
ଆହାକି ପବିତ୍ର ସ୍ଵଚ୍ଛ ! !
ହେ'ମନ ବାନ୍ଧବୀ ଆସିବକି ଜାଣି
ସ୍ଵଦେହରେ ଥରେ ପାଶେ ,
ପ୍ରୀତିର ସ୍ଵାକ୍ଷର ସୁହାଗ ସିନ୍ଦୁର
ସମର୍ପିବି ଅବକାଶେ ! !
ସପନ ସୁନ୍ଦରୀ ଭୁଲିତ ଯିବନି
ରହିଲା ମୋ' ପ୍ରେମ ରାଣ ,
ବାସ୍ତବେ ନହେଲେ ସପନ ମହଲେ
ରଖିବ ମୋ ' ପ୍ରେମ ପଣ ! !
ଭଲ ପାଇବାର ସ୍ଵପ୍ନ ଗନ୍ତାଘର
ପୁଷ୍ପେ ବିମଣ୍ଡିତ ସତ ,
ଆସପ୍ରିୟା ଧୀରେ ବଧୂବେଶେ ଥରେ
ପ୍ରତୀକ୍ଷାର ହେବ ଅନ୍ତ ! !
ସଦାନନ୍ଦ ସାହୁ ,
ଧୁରୁଷିଆ , ଆଠଗଡ , କଟକ ,
ଭ୍ରାମ୍ୟଭାଷ ସଂଖ୍ୟା - 9776184558