ଶୀତୁଆ ଗାଁପରିମଳ

ଶୀତ ଆସେ ଘନେଇ ଘନେଇ ଭାଇ 

ଜଳୀୟ ବିନ୍ଦୁ ଯାଏ ଘନେଇ ଘନେଇ l

ଆମ୍ବ ତୋଟାର ବଉଳପୁଞ୍ଜର ଭାଳେଣି

କୁହୁଡ଼ି ନଆସିବାକୁ କରନ୍ତି ଗୁହାରି l

ହନୁସର୍ଦ୍ଦାର ବସେ ଯାଇ ବର ଶିଖରେ

ସକାଳ ସୁନେଲିଖରା ପୁଇଁବାକୁ ଆକୁଳେ l

ଗାଁର ବୃକ୍ଷଲତା ବାଡ଼ି ବଗିଚା ପାହାଡ଼

ଅପୂର୍ବ ଦିଶନ୍ତି ସଦା ଘେନି କୁହୁଡ଼ି ତୋଡ଼ l

ପାଣି ପବନ କାକର ଭିଜା ଜନପଦ

କୁହୁଡ଼ି ବଳୟେ ଲୁଚି ଖୋଜନ୍ତି ଆସ୍ପଦ l

ଗାଁ କନିଆଁ ଗଣ ଧାବନ୍ତି ଶୀତକୁ ଡରି

କାଖେ ଜାକି ଗରା ଢାଳ ଓଢ଼ଣା ଟାଣି l

ମଦନା ସଅର ଠେକା ଭିଡ଼ି ଗାମୁଛା ପିନ୍ଧି

ବିଡ଼ି ଟାଣି ଟାଣି ଖୋଜି ତୋଟାର କନ୍ଦି l

ପେଟରୁ ପୁରୀଶ ଖଲାସି ପାଏ ଉଶ୍ୱାସ

ପୋଖରୀ ଭିତରେ ପଶି ଛାଡ଼େ ନିଶ୍ୱାସ l

ନରିଆ ନନା ଗାଧେଇ ତୁଠରେ ଠିଆ

କମଣ୍ଡଳୁ ପାଣି ଅର୍ପି ରବିଙ୍କୁ ମାରି ମୁଣ୍ଡିଆ l

ଚାଷୀଭାଇ ଭଉଣୀ ଗଣେ ବିଲ ମୁହାଁ

ତଦାରଖ କରନ୍ତି ରବିଶସ୍ୟ ଅଛାନିଆ l

ଚାଟଶାଳୀ ପିଲାଏ ବହିବସ୍ତାନି ଧରି

ମୁହୁଁ ବାଷ୍ପଛାଡ଼ି ଯାଆନ୍ତି ଦୌଡ଼ି ଦୌଡ଼ି l

ସୂର୍ଯ୍ୟରଶ୍ମି ଭେଦି ଆସି ଘନ କୁହୁଡ଼ିଛାତି

ପଡ଼ଇ ଧରା ପୃଷ୍ଠେ ନାଶି ଶୀତ ଅରାତି l

ଗୋଧୂଳି ଲଗନ ଧୂଳି ନଦିଶେ ବେଶୀ

ରବି ଗମନ୍ତି ଚକ୍ରବାଳେ ବିଶ୍ରାମ ଆଶେ l

ସନ୍ଧ୍ୟାରାଣୀଙ୍କର କର୍ତ୍ତବ୍ୟ ପାଳନ କ୍ରମେ 

ଦୀପଜାଳି ନମନ୍ତି ଘରଣୀଗଣ ସ୍ୱଧାମେ l

ବୃନ୍ଦାବତୀଙ୍କୁ କରିଣ ପ୍ରଣାମ ସସ୍ନେହେ 

ରାତିକରମେ ରତ ଘରଣୀ ଅତି ଆଗ୍ରହେ l

ଭାଗବତଟୁଙ୍ଗୀ ହୁଏ ସରଗରମ ତେବେ

ଭକ୍ତଗଣ ସେଠି ରୁଣ୍ଡହୋଇଥାନ୍ତି ଯେବେ l

ରାତି ଦିଘଡ଼ି ସୂଚାଏ ପହରିକିଆ ବିଲୁଆ

କିଆବୁଦାମୁଳୁ ଡାକେ ପାଟିରୁ କାଢ଼ି ନିଆଁ l

ନିଦରାଣୀଙ୍କର କୋଳେ ସଭିଁଏ କିମିଆ

ଦିନଶ୍ରମକ୍ଲାନ୍ତିରୁ ପାଆନ୍ତି ରିହାତି ଦୁନିଆଁ l

ଶୀତଥରା ଦେହେ ପକାନ୍ତି କମଳରୁମିଆ

ଉଷୁମଟାଣି ଲୋକେ କାଟି ରାତିବଢ଼ିଆ l

ଶୀତରାଣୀ ଆମ ଅତି ଲକ୍ଷ୍ମୀବତୀ ସଦା

ପ୍ରକୃତି-ଦୁହିତା ସେତ ଅନ୍ନଦାତ୍ରୀ ବରଦା l

ପ୍ରତି ବରଷ ଆସି ଏମିତି ମରତଧାମକୁ

ଶିରୀଦାନକରି ଫେରନ୍ତୁ ଅଳକାପୁରୀକୁ l

ଋତୁଚକ୍ର ହେଉ ଶୃଙ୍ଖଳିତ ଜନପଦେ

ବିଶ୍ୱବାସୀ କେବେ ନରୁହନ୍ତୁ ପ୍ରମାଦେ l