ରଙ୍ଗୀନ ହୋଲି
ରଙ୍ଗୀନ ହୋଲି
ରଙ୍ଗୀନ ଏଇ ଦୁନିଆଁ ଈଶ୍ବର ସୃଷ୍ଟ
କେତେ ଜୀବନ ରଙ୍ଗେ ପରିପୁଷ୍ଟ l
ଭବ ସାଗରେ ଭାବପୁଞ୍ଜ ତରଙ୍ଗ
ଦିଏ ରଙ୍ଗାଇ ନୃମାନସର ଢଙ୍ଗ l
ରଙ୍ଗିଲା ପରବ ଯେ ଏଇ ହୋଲି
ମିଶ୍ର ମାନବଭାବ ଯାଏ ଦୋହଲି l
ବାଘନିସହଲାନା ରଙ୍ଗେ ଆମ ପିଚକାରୀ
ଭାତୃଭାବେ ଉଚ୍ଚାଟ କରେ ମିତ୍ରଅରି l
ବରଷକୁ ଥରେ ପାଦ ଥାପେ ଏଠି
ଫଗୁଦଣ୍ଡ ସୂଚାଏ ମଧୁମାସେ ମାଠି l
ମନ-ଦେହ-ସ୍ୱାସ୍ଥ୍ୟର ବର୍ଦ୍ଧକ ପ୍ରକୃତି
ବାଇଗିଣି ରଙ୍ଗେ ଆଧାରିତ ସତତି l
ଜଗାଏ ତ ଭକତି ଆଧ୍ୟାତ୍ମିକ ଶାନ୍ତି
ସେଇ ନୀଳଫଗୁ ମନୁ ତଡ଼େ ଭ୍ରାନ୍ତି l
ଐକ୍ୟ ସମୃଦ୍ଧି ନବୀକରଣ ସ୍ରୋତେ
ଦିଏ ଭସାଇ ସବୁଜ ମାନବଜଗତେ l
ସୁଖ ଆଶାବାଦେ ଆଲୋକ ମଣ୍ଡନେ
କୃତାର୍ଥ କରେ ହଳଦୀ ମାନବ ମନେ l
ସୁପ୍ରବୃତ୍ତି ଉର୍ବର ପ୍ରେମର ତରଙ୍ଗ
ଭରିଦିଏ ନରପ୍ରାଣେ ଲୋହିତ ରଙ୍ଗ l
ଉତ୍ସାହ ଉରୁଜା ଉଜ୍ଜ୍ୱଳତା ପ୍ରାଣେ
ନାରଙ୍ଗୀ ଦିଏ ସଜାଇ ମାନବ ଗୁଣେ l
ପ୍ରକୃତି ସହ ଜଡ଼ିତ ଆମ ଏଇ ଜୀବନ
ଆଶାୟୀ ବୀଜ ହୋଲି କରେ ବପନ l
ସବୁକିଛିର ସମାହାର ହୋଲି ଆନନ
କୁଗୁଣ ପ୍ରବୃତ୍ତିରାଜିକୁ କରଇ ଦହନ l
ହୋଇଥାଏ ମନୁ ପାସୋରା ଗୁଣରାଜି
ଫଗୁରଙ୍ଗ ଚେତାଏ ସ୍ମାରକୀସାଜି l
ଅବିର ଫଗୁର ପାଣିଆ ଧୁଳିଆ ଠାଣି
ମଣିଷକୁ କରେ ଉଦ୍ଭାସିତ ଓ ଗୁଣୀ l
ହୋଲି ହେ ତୁମେ ଆସୁଥାଅ ଏମିତି
ମାନବଜାତିକୁ ଦେବାକୁ ସଦା ସୁକୃତି l
ଅଭିନଵ ତୁମ ଲୀଳା ରଙ୍ଗ ବେରଙ୍ଗୀ
ପ୍ରକୃତି ସଂଯୋଜିତ ତୁମ ଭାବ ଭଙ୍ଗି l
କର ଅନ୍ତଃ ନିହିତ ମାନବ-ଭୁଲାମନେ
ସକାରାତ୍ମକ ଭାବଧାରାମୃତ ବର୍ଷଣେ l
ମାନବଜାତି ଚିର କୃତଜ୍ଞ ତୁମ ପାଶେ
ଫଗୁଫଲ୍ଗୁ ଧାରାର ଶୁଭଙ୍କର ଫାଶେ l
ଭାତୃଭାବେ ପରିପୂର୍ଣ୍ଣ କରି ନରମନ
ସ୍ଥାପନ କର ଏଠି ଭୁ ନନ୍ଦନକାନନ l