ଶୀତ

ଶୀତ ତୁମେ ରାସ୍ତା କଡ଼ର  

ଏକେଲା ପଣରେ 

ଜଳୁଥିବା ବତୀଖୁଣ୍ଟ

ଶୀତ ତୁମେ ଗରିବ ଚାଳିର

ଜହ୍ନ ତାରା ତଳେ 

ଛିଣ୍ଡା କନ୍ଥାକୁ ନିଅଣ୍ଟ ।।

ଶୀତ ତୁମେ ଶୀତତାପ ଯନ୍ତ୍ର

କୋଠରୀ ଉତ୍ତାପ

ଧନୀ ମାନୀର ଉଚ୍ଛ୍ୱାସ 

ଶୀତ ତୁମେ କୁଆଁରୀ ମନର 

ଖିଆଲି ଭାବନା 

ମୁରୁକି ମୁରୁକି ହସ ।।

ଶୀତ ତୁମେ ଶାଗୁଆ ଘାସରେ 

ଚିକ୍‍ ଚିକ୍‍ କରି

ଝଟକୁ ଥିବା ମୁକୁତା 

ଶୀତ ତୁମେ ସୋରିଷ କ୍ଷେତରେ 

ପବନ ସାଥୀରେ 

ଉଡୁଥିବା ଶାଢୀ କଥା ।।

ଶୀତ ତୁମେ ଶୀତ ସକାଳର 

କିଚିରି ମିଚିରି 

ସକାଳ ସ୍ୱାଗତ ଗୀତ

ଶୀତ ତୁମେ ଗୋଧୂଳି ଲଗନେ 

ନୀଡ଼ ଫେରୁଥିବା 

ଅବଶ କଣ୍ଠର ଗୀତ ।। 

ଶୀତ ତୁମେ ନବ ଉନ୍ମାଦନା 

କାମନା ବାସନା 

ଶାନ୍ତି,ମୈତ୍ରୀ, ପ୍ରୀତି ଭାବ

ଶୀତ ତୁମେ ଶୀତ ସକାଳର 

କଅଁଳ କିରଣ  

ଉଷ୍ମତାର ଅନୁଭବ ।। 

ଶୀତ ତୁମେ ଗେଣ୍ଡୁ ଫୁଲର 

ବାସ୍ନାୟିତ ଲଗ୍ନ 

ମାଣବସା ଗୁରୁବାର 

ଶୀତ ତୁମେ ଘର ଅଗଣାରେ 

ପୂର୍ଣ୍ଣକୁମ୍ଭ ଟିଏ 

ଝୋଟି ଚିତାର ସମ୍ଭାର ।। 

ଶୀତ ତୁମେ କମ୍ୱଳ ତଳର 

ଅଳସୁଆ ଭାବ 

ପାହାଁନ୍ତି ପ୍ରହର ସ୍ୱପ୍ନ 

ଶୀତ ତୁମେ ଗୋଲାପୀ ଓଠରେ

ପ୍ରଥମ ଚୁମ୍ୱନ 

ଅମୃତର ଶୀହରଣ ।।