ଶବ୍ଦଙ୍କ ଗୃହବନ୍ଦୀ
ଶବ୍ଦଙ୍କ ଗୃହବନ୍ଦୀ
ଚିହ୍ନା ଲୋକଙ୍କ ଅଚିହ୍ନା କଥାରେ
ପ୍ରିୟ ଲୋକଙ୍କ ତୀକ୍ଷ୍ଣ ସମାଲୋଚନାରେ
ଆଜି ଆପଣା ଶବ୍ଦଙ୍କ ଗୃହବନ୍ଦୀ
ସେ ଶିକ୍ଷାବିତ୍ ଜଣକ
କାହିଁକି ଭେଟ ହେଉଥିଲେ କେଜାଣି
ଏମିତି ଏକ ବନ୍ଦୀ ଦେଇଦେଲେ ଯେ
ଆଜି ପ୍ରିୟ ଶବ୍ଦଙ୍କ
ଅଣନିଃଶ୍ୱାସୀ ହେବାର କୋହ ଏବଂ ଆତ୍ମଚିତ୍କାର
ଏବେ ନା ହୋଇଛି ଲକ୍ ଡ଼ାଉନ୍ ନା ସଟ୍ ଡ଼ାଉନ୍
ତଥାପି ଭୟ
କାଳେ ପୁଣିଥରେ ସଂକ୍ରମଣ ହୋଇଯିବ
ସେହି ଶବ୍ଦଙ୍କ ବନ୍ଦୀ ହେବାର ମାୟାଜାଲେ
ଏବେ କିନ୍ତୁ ଭଲ ହୋଇଛି
ମୋ ନିର୍ଜନତାର ମଜା ନେଇ
ଶବ୍ଦମାନେ ଘୁରିବୁଲୁଛନ୍ତି ମୋ ଚାରି ପାଖରେ
ଆଊ ମୋ ଅବଶ ଭାବନାକୁ ଉପଭୋଗ କରି
ଖୁବ୍ ମଜା ଉଠାଉଛନ୍ତି
ତଥାପି ମୋ ଅନ୍ୱେଷଣର ଗମ୍ଭୀରତାକୁ ହୃଦୟଙ୍ଗମ କରି
ଅଜସ୍ର ଦୁଃଖ ଏବଂ ମର୍ମାହତ
ଏଣେ ମୁଁ କିନ୍ତୁ ମୋ ହାତଲେଖା ଏତଲାକୁ ଧରି
ବାରଦ୍ଵାର ବୁଲିବୁଲି ହତାଶ
କିଏ ଦେଇଛି ମୋ ଶବ୍ଦମାନଙ୍କୁ ଗୃହବନ୍ଦୀ
ହାତ ହଲାଇ ଏବେ ଡାକିଲେ ମଧ୍ୟ
ଶବ୍ଦମାନେ ଆସିବା ପାଇଁ ନାରାଜ
ଛନ୍ଦି ହୋଇଯାଇଛନ୍ତି ନିଜ ଅଳସପଣରେ
ବେଖାତିର୍ କରି ଚାଲିଛନ୍ତି
ମୋ ହୃଦୟର ଶୁଷ୍କ ଶୂନ୍ୟତାକୁ ........!!