ଶବ୍ଦ ଅପଚୟ

ଭାଷା ସାହିତ୍ଯର   ହୋଇବ ବିକାଶ

    ଶବ୍ଦ ଭଣ୍ଡାର ରହିଛି

ଶବ୍ଦ ଅପଚୟ   ହୋଇଲେ ଘଟିବ

    ଦୋଷ,ଦୁର୍ବଳତା କିଛି ।

ଲିଖନ ପଠନ   ସୃଷ୍ଟି ପଦ ବାକ୍ଯ

    ଶବ୍ଦ ଯୋଡ଼େ ଅକ୍ଷରକୁ

ଭାଷା କଥନରେ   ଏହି ସମାଜରେ

    ଶବ୍ଦ ଗଢ଼େ ସମ୍ପର୍କକୁ ।

ଇଂରାଜୀ ଭାଷାରେ   ଛବିଶି ଅକ୍ଷର

    ବିଶାଳ ଶବ୍ଦ ଭଣ୍ଡାର

ବିଶ୍ବ ଦରବାରେ   ପ୍ରତିଟି ଦେଶରେ

    ପାଏ ସମ୍ମାନ ଆଦର ।

ବ୍ଯବହାର କରି   ପାରିଲେ ଭାଷାରେ

    ଶବ୍ଦ ହୋଇବ ରତନ

ଉତ୍ତମ ଶବ୍ଦର   ପ୍ରୟୋଗର ବଳେ

    ବଢ଼ିବ ଭାଷାର ମାନ ।

ଭାଷା ସାହିତ୍ଯର   କ୍ଷୟ କ୍ଷତି ହୁଏ

    ଶବ୍ଦ କଲେ ଅପଚୟ

ଶବ୍ଦକୁ ସଜାଇ  କହି ପାରୁଥିଲେ

    ମନରେ ନ ଥାଏ ଭୟ ।

ଶବ୍ଦ ହିଁ ଆଣଇ   ଜୀବନେ ଏମିତି

    ସ୍ନେହ,ପ୍ରେମ ପ୍ରୀତିଭାଷା

କ୍ଷଣିକ ମଧ୍ଯରେ   ଦୂରକରିପାରେ

    ଅଭିମାନ ରାଗ ଋଷା ।

ସ୍ନେହ ମମତାର  ମଳୟ ଆଣଇ

    ଦେହ ମନ ହୃଦୟରେ

ଶବ୍ଦର ତରଙ୍ଗ   ଆଙ୍କେ କେତେ ରଙ୍ଗ

    ପ୍ରତି ଜୀବନ ପୃଷ୍ଠାରେ ।

ଅପଚୟ ଶବ୍ଦ   ଆଣଇ ବିଷାଦ

    କ୍ଷଣେ ସମ୍ପର୍କ ଭାଙ୍ଗଇ

କ୍ରୋଧ,ହିଂସା,ଘୃଣା   କରେ ବାଟବଣା

    ଦିବ୍ଯ ଭାବନା ହଜଇ ।

ଶବ୍ଦ ଅପଚୟ   ନ ହେବ ଯେମିତି

    ବେଳ ଥାଉ ସାବଧାନ

ଚଲାପଥେ ଯେବେ   ଗୋଡ଼ ଖସିଗଲେ

    ଜୀବନ ହେବ ବିପନ୍ନ ।