ସେ ଆମ ଜେଜେ

ମୁଣ୍ଡରେ ତାଙ୍କର ଧବଳ କେଶ 

ପାକୁଆ ପାଟିକୁ ପାଚିଲା ନିଶ 

ମୁହେଁ ଲାଖିଥାଏ ସଦା ହରଷ ୲୲

ହାତେ ଥାଏ ତାଙ୍କ ବଙ୍କୁଲିବାଡ଼ି 

ଗଛ ଲଗାନ୍ତି ସେ ଧାଡ଼ିକିଧାଡ଼ି 

ଖୁସିରେ ବସନ୍ତି ଖବର ପଢି  ୲୲

ପିନ୍ଧିଥାନ୍ତି ଧୋତି ମାରିଣ କଛା 

କନ୍ଧେ ଥାଏ ତାଙ୍କ ନାଲି ଗାମୁଛା 

ଦିଅଁ ଦରଶନେ ତାଙ୍କରି ଇଚ୍ଛା ୲୲

ଆଖିରେ ତାଙ୍କର ମୋଟା ଚଷମା 

ଦେହେ ଥାଏ ତାଙ୍କ ସଫେଦ ଜାମା 

ଅଭିଯୋଗ ତାଙ୍କ ନଥାଏ ଜମା  ୲୲

ସବୁରି ମଙ୍ଗଳ ଇଚ୍ଛନ୍ତି ନିତି 

ଗପ ଶୁଣାନ୍ତି ସେ ନିଇତି ରାତି 

ସିଏ ପରା ଆମ ପ୍ରିୟର ସାଥୀ ୲୲

ବଡି ଭୋରରୁ ଛାଡନ୍ତି ଶେଜ 

ସକାଳ ବୁଲାକୁ ହୁଅନ୍ତି ସଜ 

ପାନ ବଟୁଆଟି ପ୍ରିୟର ଚିଜ ୲୲

 ଆମକୁ ପାଖରେ ନିତି ବସାନ୍ତି

 ନୀତି ଉପଦେଶ କେତେ ଦିଅନ୍ତି

 ଆଦର୍ଶ ମାର୍ଗଟି ସଦା ଦେଖାନ୍ତି  ୲୲

ଅତି ପ୍ରିୟ ତାଙ୍କ ଆମରି ଗାଆଁ 

ତାଙ୍କ ପାଇଁ ପରା ବାପାଙ୍କ ନାଆଁ 

ଜାଣିଛ କି ପିଲେ ତାଙ୍କରି ନାଆଁ ୲୲

ବାପାଙ୍କର ବାପା ସିଏ ଅଟନ୍ତି 

ନାତି ନାତୁଣୀଙ୍କ ପ୍ରିୟ ଅଟନ୍ତି 

ଜେଜେ ନାମେ ଆମେ ତାଙ୍କୁ ବୁଲାନ୍ତି  ୲୲