ସ୍ୱାଧୀନତାର ସ୍ୱାଦ

ସ୍ୱାଧୀନତା ଏଠି ପ୍ରଶ୍ନବାଚୀ ଆଜି 

ବିତି ଯାଇଅଛି ବହୁ ବରଷ 

ଶାସନ ହୋଇଛି ଶୋଷଣର ବଶ 

ଲେଖି ନୂଆ ଇତିହାସ 

କାହାକୁ ବା ଦେବା ଦୋଷ 

ସ୍ୱାର୍ଥର ନାଆରେ ନଈ ହେଉ ପାରି 

ନାଉରି ସାଜିଛି ନର ରାକ୍ଷସ 

ହିଂସା ଅସୁରୁଣୀ କୁହୁକ ଦେଖାଏ 

ନର ରକ୍ତ ନର ଯାଉଛି ଶୋଷି 

ସଂତ୍ରାସବାଦର ସଂଘର୍ଷରେ ଆଜି 

ନିରୀହ ଜନତା ପାଉଛି ଫାଶୀ 

ଯନ୍ତ୍ରଣା ଚକିରେ ପେଷି 

ଦୁର୍ନୀତିର ଦୂର ଦିଗବଳୟେ ଦେଖ 

ଅନ୍ଧାର କୁହୁଡି ଦିଶୁଚି ବେଶୀ 

ପାଇଖାନା ଠାରୁ ପାର୍ଲାମେଣ୍ଟ ଯାଏ 

ଯୋଜନା ଯାଇଛି ଫସର ଫାଟି 

ସ୍ୱାର୍ଥ କନା ବନ୍ଧା ସବୁରି ଆଖିରେ 

ହଜି ଯାଇଅଛି ସମ୍ପର୍କ କାଠି 

କାହାକୁ କହିବ ଏଠି 

ବଡ଼ ବଡୁଆଙ୍କୁ କି ଅବା ଉତ୍ତର 

ଗରିବ ମରଇ ଖଟି 

ନାରୀର ସୁରକ୍ଷା କାଗଜେ ସୀମିତ 

ରାଜରାସ୍ତା ତାର ଅଟଇ ସାକ୍ଷୀ 

ନ୍ୟାୟ ନିକିତି ନୀରବ ସାଜିଛି 

ଲୁହ ନିଗାଡୁଛି ନିରୀହ ଆଖି 

ମୁହେଁ ଭଲ ରଙ୍ଗ ମାଖି 

ଅଭିନେତା ହ୍ୱନ୍ତି ରାଜନେତା ସବୁ 

ଭୋଟ ହେଲେ ପାଖା ପାଖି 

ସମୟ ରହିଛି ସୁଧୁରିବ ଭାଇ 

ସୁନାର ଭାରତ ଗଢିବା ଆମେ 

ଦେଶ ଜାତି ପାଇଁ କର୍ମ କରିଯିବା 

ସୁନାମ ଆଣିବା ଦେଶର ନାମେ 

ପୁଣି ଏହି ଧରା ଧାମେ 

ଗଗନ ପବନ ମୁଖରିତ ହେବ 

ରଘୁପତି ରାଜା ରାମେ