ପୂଜା ଲାଗୁନି ମଜା

ସବୁ ବରଷ ପୂଜା ଆସିଲେ

      ମନଟା ଲାଗେ ତାଜା,

ଏ ସନ କିନ୍ତୁ ପୂଜା ଆସିଛି

      ପୂଜାରେ ନାହିଁ ମଜା |

ଆସିଛି ଏବେ ଦଶରା ହେଲେ

      ଆଣିନି କିଛିଖୁସି,

ପୂଜାମଣ୍ଡପେ କଟକଣାରେ

      ହୋଇବ ପୂଜା ନୀତି |

ଗହଳି ନାହିଁ ଚହଳି ନାହିଁ

      ନିଶୁନ୍ ଚାରିଆଡ,

ଭଳିକି ଭଳି ରଙ୍ଗଜରିରେ

       ସଜା ହେଉନି ମେଢ଼ |

ତୋରଣ ନାହିଁ, ଆଲୋକ ନାହିଁ

       ନାହିଁ ଗାଡିର ଭିଡ,

ରାମଦୋଳିରେ ବସିବା ପାଇଁ

       ନାହିଁ ପଲାଙ୍କ ଗୋଳ |

ପେଁକାଳିର ଶବଦେ ଏବେ

       କମ୍ପୁନି ଚାରିଆଡ,

ମଣ୍ଡପ ପାଖେ ନାହିଁ କଣ୍ଢେଇ

        ବେଲୁନ୍ ବାଲା ଭିଡ |

ରାସ୍ତାକଡରେ ନେଉନି କେହି

        ଗୁପଚୁପର ମଜା,

ଦହିବରାଠି ଜମୁନି ଭିଡ

       ହେଲେ ସେ ଯେତେ ତାଜା |

ଲୁଗାଦୋକାନେ ଗହଳି ନାହିଁ

       ଲାଗୁଛି ଖାଲିଖାଲି,

ସବୁଠି ଶୁଭେ ଗୋଟିଏ କଥା

        ଆସିଛି ମହାମାରୀ |

ବେପାରୀଙ୍କର ବେପାର ମାନ୍ଦା

       ଚାଲୁନି କାରବାର,

ଜୀବିକା ଆଜି ବନ୍ଧା ପଡିଛି

       ଖାଲି କରୋନା ଡର |

ଛୋଟପିଲାଙ୍କୁ ମନା ଏସନ

        ବଜାର ଯିବା ପାଇଁ,

ବୟସ୍କଲୋକେ ଘରୁ ବାହାରି

        ବଜାର ଯିବେ ନାହିଁ |

ସବୁଠି ଏବେ ଶୁଭୁଛିଖାଲି

      କୋଭିଡ୍ କଟକଣା,

କୋଭିଡ୍ ଏବେ ସବୁ ଲୋକଙ୍କୁ

       କରିଛି ବାଟବଣା |

ପୋଲିସ୍ ଛକେ ତାଗିଦ୍ କରେ

      ନଥିଲେ ମୁହେଁ ମାସ୍କ,

ଏହି ସ୍ଥିତିରେ ପୂଜା ଲାଗୁଛି

      ସତେକି ଗୋଟେ ଫାର୍ସ |

ମଣ୍ଡପ ପାଖେ ଜମୁନି ଭିଡ

      ପୋଲିସ୍ ଅଛି ଜଗି,

ଟିକିଏ ଯଦି ହୋଇବ ଭୁଲ

      ଫାଇନ୍ ଯିବ ଲାଗି |

ବନ୍ଧୁବାନ୍ଧବ ଆସନ୍ତି ନାହିଁ

      କାହାରି ଘରେ କେହି,

ବନ୍ଦୀ ଜୀବନ କାଟୁଛେ ଆମେ

       ସଭିଁଏ ଘରେ ରହି |

ଅସମୟରେ ଝରିଯାଉଛି

       ଜୀବନ ଆଜି କେତେ,

କେତେ ଯେ ପିଲା ଅନାଥ ହେଲେ

       ହିସାବ ନାହିଁ ସତେ |

ମଣିଷ ଆଜି ଭୟ କରୁଛି

      ମଣିଷ ଦେଖିଦେଲେ,

କେତେଦିନ ମାଆ ରହିବୁ ଆମେ

       ଏମିତି ଏକା ଘରେ |

ଏମିତିବେଳେ ଆସୁଛ ଯଦି

       ଟିକିଏ କର ଦୟା,

ବନ୍ଦୀଜୀବନୁ ମୁକତି ଦିଅ

       ଡାକୁଛୁ ମହାମାୟା |

ଶୁଣିଛୁ ମାଆ ବିପଦବେଳେ

        ଆସ ତ ଅବତରି,

ସେହି ସମୟ ଆସିଛି ଏବେ

        କରନା ଆଉ ଡେରି |