ପ୍ରେତର ପ୍ରତିଶୋଧ

ମଦିରା ରାକ୍ଷସ ଅଶ୍ଳୀଳ ସଂସ୍କାର ଖାଇଗଲା ସମାଜକୁ

ନାରୀଟିଏ ଯହିଁ ସୁରକ୍ଷିତ ନୁହେଁ ନିନ୍ଦିବା ଯାହା କର୍ମକୁ ।

ଜନନୀ ଭଗିନୀ ଜାୟା କନ୍ୟା ଆମ ସେହି ନାରୀ ଟିଏ ପାଇଁ

ଯା ଠାରୁ ଜନମ ଲଭିଛ ନିର୍ବୋଧ ମାନ ତା ରଖିବ ନାହିଁ !

କି ଦୋଷ କରିଲା ଏକୁଟିଆ ଯୁବତୀକୁ ଘରୁ ଘୋଷାରି ଆଣିଲ

ଦୁଇ ଜଣ ନର ରାକ୍ଷସ ପିଶାଚ ପରି ଆଚରଣ କଲ !

ଲୁଟିଲ ଇଜ୍ଜତ ତୃପ୍ତି ନମେଣ୍ଟିଲା ଗଣ ବଳାତ୍କାର କରି

ବିଭତ୍ସ ଭାବରେ ବିଦୀର୍ଣ କରିଣ ପକାଇଲ ତାକୁ ମାରି ।

ବାପା ମାଆ ତା'ର ପେଟ ପାଟଣାରୁ ଫେରି ଦେଖିଲେ ଘଟଣା

ବିକଳ କ୍ରନ୍ଦନ ବୁକୁଫଟା ତାଙ୍କ ହୋଇଗଲା ବୁଦ୍ଧି ବଣା ।

ସମାଜ ଓଲଟି ଦୁଶ୍ଚରିତ୍ରା ଆଖ୍ୟା ଦେଇ କରିଲା ଧିକ୍କାର

ବଡ ପଣ୍ଡାଙ୍କର ପୁଅ ତୁମେ ଯେଣୁ ସାହସ ଅଛି କାହାର !

ଆଇନର ଦ୍ବାର ଅଡୁଆ ବଢାଇ ପୁଲିସର ତାନମାନ

ଆତ୍ମ ସମ୍ମାନ ଘେନି ଆତ୍ମହତ୍ୟା କଲେ ସେହି ଦୁଇ ଜଣ ।

ସମାଜର ସ୍ମୃତି ଶକ୍ତି ଦୁର୍ବଳ ଭୁଲେ ଭାବି ଦୁର୍ଘଟଣା

ଝିଅଟିର ପ୍ରେତ ଆତ୍ମା ଘୁରିବୁଲେ ଭୁଲିବ କି ସେ ଘଟଣା !

ଜଙ୍ଗଲରୁ ଦିନେ ବଣଭୋଜି ସାରି ଆକଣ୍ଠ ମଦିରା ପାନ

ଅନ୍ତେ ଫେରୁଥିଲେ ହାବୁଡିଲା ପ୍ରେତ ଛନକା ପଶିଲା ମନ ।

ନେହୁରା ହୋଇଲେ ନିଶାଗ୍ରସ୍ତ ହୋଇ କରିଥିଲୁ ଅଘଟଣ

ଛାଡିଦିଅ ବାରେ ଆଉ ନ କରିବୁ ଏପରି ଘଟଣା ମାନ ।

ପିଶାଚଙ୍କୁ ପୈଶାଚିକ ନିର୍ଯ୍ଯାତନା ସମୁଚିତ ବ୍ୟବହାର

କାନୁନ ଯା ପାଖେ ହାର ମାନେ ସେ ନୁହଁଇ ପାତର ଦୟାର ।

କେତେ ଦଣ୍ଡ ନିଜେ ବରିନେଲେ ଦୁହେଁ କାଳେ ବଂଚିବ ଜୀବନ

ମୃତ୍ୟୁ ଦଣ୍ଡ ଛଡା ଆନ କେଉଁ ଦଣ୍ଡ ହୁଅନ୍ତା କି ପ୍ରତିଦାନ !

ଶୂନ୍ୟକୁ ଉଠାଇ କଚାଡି ଦୁହିଁଙ୍କୁ ମାରିଲା ପ୍ରେତ ନିର୍ଘାତ

ରଡିରେ ତାଙ୍କର ଭୁବନ କମ୍ପିଲା ସ୍ତବଧ ହୋଇଲା ବାତ ।

ହାଲୁକା ହୋଇଲା ପ୍ରେତ ଅନ୍ତରାତ୍ମା ଶୂନ୍ୟ ରେ ମିଳାଇ ଗଲା

ଜନତା ଜାଣିଲେ କଲା କରମର ଯଥାର୍ଥ ଫଳ ମିଳିଲା ।

କାହାଣୀ ନମଣ ଘଟୁଛି ଏପରି ଅଧିଭୌତିକ ଘଟଣା

ଚେତି ଯାଅ ନର ପିଶାଚ ବିବେକ କର ନାହିଁ ବାଟବଣା ।