ପିଲାଦିନ
ପିଲାଦିନ
ମନେପଡ଼େ ମୋର ସେହି ସୁନ୍ଦର ପିଲାଦିନ
ଗାଁ ଚାଟଶାଳି ସାଙ୍ଗସାଥୀ ମେଳ
ମନେପଡେ ମୋ ଗାଁର ମନୋହରା ଛବି
ପୁନେଇଁ ଜହ୍ନରେ ବାଗୁଡ଼ି ଖେଳ ।
ମନେପଡେ ମୋର କାଗଜର ଡଙ୍ଗା
ସାଙ୍ଗସାଥି ମାନ ଅଭିମାନ
ମନେପଡେ ଶ୍ରାବଣର ବର୍ଷାପାଣି
ସେଇ ଅଭୁଲା ପିଲାଦିନ ।
ମନେପଡେ ସେଇ ବୋହୁଚୋରି ଖେଳ
ବରଗଛ ଡ଼ାଳେ ଦୋଳି
ମନେପଡେ ବାପାଙ୍କର ତାଗିଦ୍
ମାଆ ହାତ ମାଡ ଗାଳି ।
ମନେପଡେ ମୋର ସେ ପୁରୁଣା ସ୍ମୃତି
ସେଇ ଅଭୁଲା ସମୟ
ମନେପଡେ ମାଆ ହାତରନ୍ଧା
ଶୀତ ସକାଳର ବିଦ୍ୟାଳୟ ।
ମନେପଡେ ଶିକ୍ଷକଙ୍କର ବେତଛାଟ
ବାପାଙ୍କ ଆକଟ ଗାଳି
ମନେପଡେ ରଜଦୋଳି ,ଫଗୁଖେଳ
ଭାଇ ଭଉଣୀର ମିଛକଳି ।
ମନେପଡେ ମାଟି ସିଲଟ,ଚକ୍ ଖଡିରୁ
କାଗଜ କଲମ ଯାତ୍ରା
ମନେପଡେ ଆଈମାଆର କାହାଣୀ
ବର୍ଣ୍ଣବୋଧ ବହି ଯୁକ୍ତାକ୍ଷର ମାତ୍ରା ।
ମନେପଡେ ଗାଁ ଯାନି ଯାତରା
ନିତି ନୂଆ ନୂଆ ସପନ
ମନେପଡେ ନିତି ବାଲିଘର ଖେଳ
ସେଇ ଅତୀତର ପିଲାଦିନ ।
ବୟସ ତଟିନୀ ଯାଉଛି ବହି
ହଜିଯାଇଛି ମୋ ପିଲାଦିନ
ସମୟ ଧୂଳିରେ ସ୍ମୃତିକୁ ଝୁରୁଛି
ମୋର ଏ ଅବୁଝା ମନ ।