ପାଠଶାଳା ସ୍ମୃତି

ବଦଳିନି ସେଇ ପାଠଶାଳା ଆମ

ବଦଳି ଯାଇଛି ରଙ୍ଗ,

ବୟସର ସେଇ ଅମଡ଼ା ବାଟରେ

ବଦଳି ଯାଇଛି ଢଙ୍ଗ ।

ଅଛି ସିନା ସେଇ ଖେଳ ପଡ଼ିଆଟି

ନାହିଁ ଆଉ ଏକ ମନ,

ଦେହ ମୋର ଆଜି ପରଦେଶେ ଅଛି

ଅରଜିବା ପାଇଁ ଧନ ।

ସମୟର ଘଣ୍ଟା ଚାଲେ ଟିକ୍ ଟିକ୍ 

ହୁଏନାହିଁ ବାଟବଣା,

ସେଇ ବରଗଛେ ସେଇ ନଦୀ ତୁଠେ

ଖୋଜେ ମୁଁ ସାଥି ଠିକଣା ।

ଦିନ ପରେ ଦିନ ମାସ ପରେ ମାସ

ଯାଉଛି ବରଷ ବିତି,

ଜୀବନରେ କେବେ ଭୁଲି ହୁଏନାହିଁ

ସେହି ବାଲ୍ୟକାଳ ସ୍ମୃତି ।

ଅତୀତର ସେହି ହସଖୁସି ଦିନ

ଆସିବନି ଆଉ ଫେରି,

ଚଗଲା,ବଗଲା ଦୁଷ୍ଟ ଦିନ ସବୁ

ମନେପଡେ ମୋର ଭାରି ।

ଗୁରୁଜୀଙ୍କ ବେତ ପାହାରେ ଏ ହାତ

ଫକ ଫକ ଡ଼େଉଁଥିଲା,

ଦୁଃଖଲାଗେ ଆଜି ସେ କଥା ଭାବିଲେ

କେମିତି ଭୁଲିବି ଭଲା ।