ଓଗାଳିବା ଆସ ବାଟ

ହେଇ ଦେଖ ଏବେ ଯାଉଛି କହ୍ନେଇ

ଓଗାଳିବା ଆସ ବାଟ ,

ପଚାରିବା ତାକୁ ଯମୁନା କୂଳରେ

ଲଗାଉଛି କିଆଁ ନାଟ !!

ଯଶୋଦା ରାଣୀଙ୍କୁ କହିଲେ ତ ଯାଇ

ମଣୁ ନାହାଁନ୍ତି ତା' ସତ ,

ତେଣୁ ମୁହଁ ତା'ର ବଢ଼ି ଯାଉଅଛି

ଜନେ ଦେଉଛନ୍ତି ମତ ।

ଲୁଚି ଛପି ନିତି ଯମୁନା କୂଳରେ

କରୁଅଛି ଆସି ଦେଖା ,

କଳସୀରେ ନୀର ଆଣିଲା ବେଳକୁ

ଭାଙ୍ଗୁଅଛି ମାରି ଟେକା ।

କାହାଘରେ ପଶି ସଖାଙ୍କ ଗହଣେ

କରୁଅଛି ନିତି ଚୋରି ,

ମୁରବୀ ସାଜିକି ବାଣ୍ଟି ଦେଉଅଛି

ଦୁଧ,ଦହି ମନ ଭରି ।

ଶିକାରୁ ଆଟିକା ଭାଙ୍ଗି ଗଡ଼ାଉଛି

ଦେଖିଦେଲେ ଯାଏ ରୁଷି ,

ହେଇ କିସ କଲୁ କହିଲା ବେଳକୁ

ପଳାଉଛି ସେଠୁ ଖସି ।

ଆଜି ଏତେଦିନେ ପଡ଼ିଛି ହାବୁଡ଼େ

ଦେବାନାହିଁ ଜମା ଛାଡ଼ି ,

ନନ୍ଦ ରାଜା ଆଗେ ଗୁହାରି କରିବା

ନେଇଯିବା ଚାଲ ଭିଡ଼ି ।।