ନମସ୍ତେ ମା' କାଳରାତ୍ରି

ନମସ୍ତେ ମା' କାଳରାତ୍ରି କରାଳ ଵଦନୀ

ଉନ୍ମୁକ୍ତ କୁନ୍ତଳେ ମାତେ ବିପୁଳ ଦଶନୀ l

ମହାଦେବୀ ମହାମାୟୀ ଋଗ୍ବେଦ ବର୍ଣ୍ଣିତା

ଶକ୍ତିମୟୀ ରାତ୍ରୀରୂପେ ଶକ୍ତି ପରମାତ୍ମା ।

ଘୋର ତିମିରରେ କରୁ ଏ ବିଶ୍ୱ ବିଲୟ

ଅଜ୍ଞାନ ତିମିର ନାଶୁ ଦାନେ ବରାଭୟ l

ନିଦ୍ରାରୂପେ ସର୍ବପ୍ରାଣୀ ମଧ୍ୟେ ବିରାଜିତା

ଯୋଗନିଦ୍ରାକାଳେ ତୁହି ଶ୍ରୀବିଷ୍ଣୁ ଭଜିତା l

କାଳି କାଳି ମହାକାଳୀ ନୃମୁଣ୍ଡ ମାଳିନୀ

ମନ୍ଦାରମାଳିନୀ ମାତ ବିଶ୍ୱ ସଂହାରିଣୀ l

ଚତୁର୍ଭୁଜା ମାଆ ଖଣ୍ଡା, ଖର୍ପର ଧାରିଣୀ

ଜଗତ ଜନନୀ ପାପୀ ଭୟ ସଞ୍ଚାରିଣୀ l

କୃଷ୍ଣା ଶ୍ୟାମା କୃଷ୍ଣବର୍ଣ୍ଣି କୃଷ୍ଣ କାଳରାତ୍ରୀ

ଜଗତ ଆଧାର ମହା ଶକ୍ତି ଜଗଦ୍ଧାତ୍ରୀ l

ତୋର ଶକ୍ତି ବିନେ ଶବପ୍ରାୟ ସଦାଶିବ

ବିଶ୍ୱ ପର୍ଯ୍ୟଟନ ତୋର ବାହନ ଗର୍ଦ୍ଦଭ l

ବିପୁଳ ଜଘନୀ ମାତ ଜଗତ କଲ୍ୟାଣୀ

କିଳିକିଳାନାଦେ କମ୍ପେ ସମଗ୍ର ଅବନୀ l

ମହା ଶକ୍ତି, ପରା ଶକ୍ତି ଜଗତେ ବନ୍ଦିତା

ପ୍ରିୟପୁଷ୍ପ ତୋର ମାତ କୃଷ୍ଣାପରାଜିତା l

ଶୁଭଙ୍କରୀ ସର୍ବ ଦୁଃଖ ହର ମା' ଜନନୀ

ନମସ୍ତସୈ,ନମସ୍ତସୈ ନମଃ ନାରାୟଣୀ l