ନିଅନ୍ତି ବରଷା ସୁଖ

ପହିଲି ଆଷାଢ଼ ବରଷା ଟୋପାଟି

ଝରିଗଲେ ଝରଝର ,

ଚକା ଭଉଁରୀଟି ଖେଳିବାକୁ ମନ

ହୁଏ ଖାଲି ତରତର ।

ପାଇ ସେ ବରଷା ଛୁଆଁ,

ପ୍ରକୃତିରାଣୀଟି ସରମି ତ ଯାଏ 

ସତେ କିବା ବୋହୂ ନୂଆ !!

ପତ୍ର ଗହଳରେ ବୃକ୍ଷ ଲତା ଯେତେ

ସବୁଜ ସୁନ୍ଦର ଦିଶେ ,

କେତେ ଜାତି ଫୁଲ ଫୁଟି ଯାଇ ଖାଲି

ମହମହ ଆହା ବାସେ ।

ସାଧବବୋହୂଏ ମିଶି ,

ନାଲି ପାଟ ପିନ୍ଧି ଥିରି ଥିରି ହୋଇ

ଯାଆନ୍ତି କୁଆଡ଼େ ହସି ।

ଗଛ ଆଢୁଆଳେ ଡେଣା ଝାଡ଼ି ପକ୍ଷୀ

ନିଅନ୍ତି ବରଷା ସୁଖ ,

ବେଙ୍ଗ ବେଙ୍ଗୁଲୀଏ ଗୀତ ଗାଇ ଗାଇ

ଡେଉଁଥା'ନ୍ତି ଫକଫକ ।

ଚାଷୀ ଭାଇ ହୁଏ ସଜ ,

ଜମିରେ ବୁଣିବ ନୂଆ ବିହନ ତା'

ଆଗେ ସରିଗଲେ ରଜ ।