" ମୋ ଗାଁ ଟା ବଦଳି ଗଲାଣି "

ସାଇକେଲଟିରେ ଫେରିବାଲା କାହିଁ 

ଆଉ ଲୁଗା , ଶାଢ଼ୀ ନେଇ ଆସୁନି ,

ଭଳି ଭଳି ରଂଗ ଲୁଗା ବାଛିବା ପାଇଁଁକି

ମୋ ଗାଁ ଦାଣ୍ଡରେ ମାଇପିଙ୍କ ଭିଡ଼ ଜମୁନି ,

ଅତର , ସାବୁନ , ସିନ୍ଦୁର , ଶଙ୍ଖାରୀର

ପସରା ମେଲିବାର ଦିନ ଗଲାଣି ,

ମୋ ଗାଁ ଟା ବଦଳି ଗଲାଣି ।

ସକାଳୁ ସକାଳୁ ବୃନ୍ଦାବତୀଙ୍କ ମୂଳରେ

ଧୂପ କାଠି କେଞ୍ଚା ଆଉ ହେଉନି ,

ଅନ୍ଧାର ଆଗରୁ ମାଟି ଦୀପର ସଳିତା

ଘରେ ଘରେ କାହିଁକି କେଜାଣି ଜଳୁନି ,

ଅଂଗାରକୁ ଜାଳି ମାଟି ପାତ୍ରଟିରେ

ଝୁଣା ଦେବାର ସମୟ ଗଲାଣି ,

ମୋ ଗାଁ ଟା ବଦଳି ଗଲାଣି ।

ଆଳୁ , ବାଇଗଣ ଅବା ଶୁଖୁଆଟିଏ ବି

ଆଉ ଭଲ କରି ପୋଡି ହେଉନି ,

ଇଟା , ମାଟି ଦେଇ ତିନି ଆଖି ବାଲା

ମାଟି ଚୂଲିଟିଏ ବି କାହିଁକି ଦିଶୁନି ,

ଚୂଳି ମୂଳେ ଥିବା ବାଉଁଶ କାଠର

ନଳଟିଏ ଆଜି ସ୍ମୃତିଟିଏ ହୋଇ ଗଲାଣି ,

ମୋ ଗାଁ ଟା ବଦଳି ଗଲାଣି ।

ନୂଆ ବରଷରେ ସାଂଗ ସାଥି ମେଳେ

ଗ୍ରୀଟିଙ୍ଗସ ଦିଆ ନିଆ ଆଉ ହେଉନି ,

" ଡିଅର ଡିଅର ହାପି ନିୟୁ ଇଅର "

ଗ୍ରୀଟିଙ୍ଗସରେ ଲେଖା ହେଉନି ,

ନୂଆ ବରଷରେ କୋଡ଼ିଏ ଟଙ୍କିଆ

ବ୍ରଏଲର କୁକୁଡା ଭୋଜିର ଦିନଟି ଗଲାଣି,

ମୋ ଗାଁ ଟା ବଦଳି ଗଲାଣି ।

ବିଭାଘର ପାଇଁ ଝିଅ ଦେଖି ଆସିବାରେ

ଅଭିଆଡି ଝିଅ ଶାଢ଼ୀ ପିନ୍ଧି ଦେଖା ଦେଉନି , 

(ନିର୍ବନ୍ଧ)ପାଟମୁଦି ବେଳେ ଚୁଡ଼ା ଉଖୁଡା ସାଂଗରେ

ବୁନ୍ଦିଆ ମିଠାର ପାଟମୁଦି ଭୋଜି ହେଉନି ,

ପାଲିଙ୍କିରେ ବର ସବାରୀରେ କନ୍ୟା

ଦେଖିବା ଦିନଟି ଅତୀତ ହେଲାଣି ,

ମୋ ଗାଁ ଟା ବଦଳି ଗଲାଣି ।