ମନ ଚୋରି

ସାତ ସିନ୍ଦୁକର ସାଇତା ଧନ ମୋହରି ମନ

କେଡ଼େ ଛଟକରେ ଛଇଳି ତାକୁ ହରଣ |

ଗଜା ଉରଜର ଫରୁଆ ତଳେ ରଖିଲୁ ନେଇ

କାଳେ କାହା ଦୃଷ୍ଟି ପଡ଼ିବ ବାସେ ଦେଲୁ ଘୋଡେଇ |

ସୁନା ଗୋରା ତନୁ ରଥରେ ତାକୁ ଯତ୍ନେ ବସେଇ 

ନୟନ କୁରଙ୍ଗ ଚାଳନେ ଶୋଭା ବନେ ବୁଲେଇ |

ସୁରଙ୍ଗ ଅଧର ପୀୟୂଷ ରସ ଦେଲୁ ପିଆଇ 

ବଳିଷ୍ଠ ଜଘନ ନିତମ୍ବ ସିଂହାସନ ମଣ୍ଡାଇ |

ପ୍ରେମ ପ୍ରୀତି କାମ ସମ୍ଭୋଗ ନୀରେ କରାଇ ସ୍ନାନ 

ଗୁପ୍ତ କାମଦେବ ମନ୍ଦିର ତୀର୍ଥେ କଲୁ ସଂସ୍ଥାନ |

କଳା କଲ୍ଲୋଳିନୀ କୁନ୍ତଳେ ଯତନରେ ରଖେଇ 

ବକ୍ଷୋଜ ଶମ୍ଭୁର ପୂଜନ ମନ୍ତ୍ର ଦେଲୁ ଶିଖେଇ |

ଡମ୍ବରୁ କଟିର ମେଖଳା ପଦ ନୂପୁର ସ୍ୱନେ

ଗୋଲାପୀ ଓଠରେ ଗଣ୍ଡକୁ ମଣ୍ଡି ଗାଢ଼ ଚୁମ୍ବନେ |

ରସାଇ ଫସାଇ ରଖିଲୁ କାହିଁ ମାୟା ନଗରେ

କିମିଆ କଲୁ କି ଯାଦୁରେ ମନ ନଫେରେ ଘରେ |

ମନ ନେଇଥିଲୁ ପ୍ରାଣକୁ ଏବେ ନେଉ ଓଟାରି

ଜୀଇଁଥାଉ ଶବ ହୋଇଲି ମାରେ ହର ଭଗାରି |

ଧରା ଦିଅ ବାହୁ ବନ୍ଧନେ ସଜ ସରୋଜ ମୁଖୀ

ପାତି ଦେଇ ଅଙ୍ଗ ବଲ୍ଲରୀ ରତେ କରାଅ ସୁଖୀ |

ଭୁବନ ମୋହିନୀ ହୁଅତୁ ମୋର ପ୍ରାଣସଙ୍ଗିନୀ

କଳା କାଦମ୍ବିନୀ କୋଳରେ ଖେଳ ହୋଇ ଦାମିନୀ ||