ମହାବିଷୁବ ସଂକ୍ରାନ୍ତି

ସୌର ଜଗତରେ ନିତି ଘଟିଥାଏ

  ନାନାଦି ଭୌତିକ କ୍ରିୟା ,

ବାରମାସେ ବାର ରାଶି ର ପ୍ରଭାବ

   ଜୀବ ଦେଖେ ପ୍ରତିକ୍ରିୟା ।

ପ୍ରତି ମାସ ଶେଷରେ ସୂର୍ଯ୍ୟଦେବତା

   କରନ୍ତି ରାଶି ପରିବର୍ତ୍ତନ ,

ରାଶି ପ୍ରବେଶ ର ପ୍ରଥମ ଦିନ ଟି

   ହୁଏ ସଂକ୍ରାନ୍ତି ନାମକରଣ ।

ସଂକ୍ରାନ୍ତି ପୁରୁଷ ମୀନ ରାଶି ଛାଡି 

   ମେଷରେ କଲେ ପ୍ରବେଶ ,

ଉତ୍ତରାୟଣ ଘଟେ ସୂର୍ଯ୍ୟ ଦେବତାଙ୍କ

    କରନ୍ତି ଉତ୍ତାପ ପ୍ରକାଶ ।

ମେଷ ପ୍ରବେଶ ର ପ୍ରଥମ ଦିନ ଟି

     ମହାବିଷୁବ ସଂକ୍ରାନ୍ତି ,

ଶ୍ରୀରାମ ଭକ୍ତ ବୀର ଆଞ୍ଜନେୟଙ୍କ

     ପାଳନ୍ତି ଜନ୍ମ ଜୟନ୍ତୀ ।

ବସନ୍ତ ଫେରଇ ଆସଇ ବୈଶାଖ

    ଅଭାବ ବଢେ ଜଳର ,

ଶରୀରରୁ ଜଳ ନ କମିବା ଲାଗି

   ବସେ ପଣା ର ଆସର ।

ଘରେ ଘରେ ପଣା ସଂକ୍ରାନ୍ତି କହନ୍ତି

    ଓଡ଼ିଶା ର ନବବର୍ଷ ,

ସୂର୍ଯ୍ୟଦେବତାଙ୍କୁ ପଣା ସମର୍ପଣ କରି

     ଜନ ମାନସ ହରଷ ।

ଶୈବପୀଠ ବସେ ନୂତନ କଳସୀ

    ଜଳଝରେ ଲିଙ୍ଗ ପରେ ,

ଚଉରା ଉପରେ ଠେକି ବାନ୍ଧି ଦେଇ

   ବୃନ୍ଦାବତୀଙ୍କୁ ଦିଏ ଘଡିରେ ।

ଘରେ ଘରେ ଜମେ ପଣା ର ଆସର

    ବାସ୍ନାରେ ମହକେ ଘର ,

ପୂର୍ବ ପୁରୁଷର ଏ ପଣା ପରମ୍ପରା

    ହିତ କରଇ ଆମର ।

ଖରା ପ୍ରକୋପରୁ ସ୍ବାସ୍ଥ୍ୟ ରକ୍ଷା ପାଇଁ

     ଦହି ,ସରବତ ପିଇ ,

ଦେହ ର ଜଳୀୟ ଅଂଶ ବଢ଼ିଥାଏ

     ଶରୀର ଥଣ୍ଡା ରଖଇ । 

ଘଣ୍ଟ ପାଟୁଆ କୁ ଦଣ୍ଡ ନାଚଧାରୀ

  ନାଚି ବୁଲନ୍ତି ଗାଁ ଗାଁ ରେ ,

ଵୁଢୀ ଠାକୁରାଣୀ ବୁଲି ବାହାରନ୍ତି

   ଆଡ଼ମ୍ବରରେ ବାପଘରେ ।

କିଏ କହେ ପଣା ସଂକ୍ରାନ୍ତି ଏହାକୁ

   କିଏ ମହାବିଷୁବ ସଂକ୍ରାନ୍ତି ,

ହନୁମାନ ଜନ୍ମ ଦିବସ କେ ପାଳେ

     ଠାକୁରାଣୀ ଜାତ କହନ୍ତି ।

ବାରମାସେ ତେର ପର୍ବ ଓଡ଼ିଶାରେ

     ପାଳନ୍ତି ପୁରପଲ୍ଲୀରେ ,

ପଣା ପାଣି ପିଇ ଦଣ୍ଡଧାରୀ ଯେତେ

    ଵାହୁଡନ୍ତି ଯେଝା ଘରେ ।

ମିଳନର ପର୍ବ ବିଷୁବ ସଂକ୍ରାନ୍ତି

  ନୂଆ ପାଞ୍ଜି ପ୍ରଚଳନ , 

ନୂଆ ବରଷକୁ ସ୍ବାଗତ କରିବା

    ସୁଖରେ କଟିବ ଦିନ ।