ମାଆ ମୋ ପ୍ରେରଣାଦାତ୍ରୀ

ନଅ ବୟସରୁ ରୁଚି ହେଲା ମୋର

ସାହିତ୍ୟ ସାଧନା ପ୍ରତି ,

ବାରବାର ମୋତେ ଉତ୍ସାହିତ କଲେ

ମାଆ ମୋ ପ୍ରେରଣାଦାତ୍ରୀ।

ଲେଖିବାକୁ ତେଣୁ ଚେଷ୍ଟା କରି ମୁହିଁ

ସାରିଲି କାଗଜ-ସ୍ୟାହି ,

କିଛି ଦିନପରେ ସଫଳ ହୋଇଲି

ହେଉ ପଛେ ଯାହିତାହି ।

ଗଦ୍ୟରୁ ଆରମ୍ଭ କରୁକରୁ ଲେଖା 

ପଦ୍ୟକୁ ଲେଖିଲି ପୁଣି ,

ଗପ ,ଗୀତ ସହ ପ୍ରବନ୍ଧ ,ଜୀବନୀ

ଖୁସିହେଲେ ପିଲେ ଶୁଣି ।

ଆକାଶବାଣୀ ଓ ପତ୍ରପତ୍ରିକାକୁ

ପଠାଇବା ଲାଗି ଲେଖା ,

ବାପା ଆଣିଦେଲେ ଡାକଘରୁ ପରା

ଖାମ,ଟିକେଟ,ଲଫାପା ।

ଲେଖା ମୋର ଯେବେ ପ୍ରଚାରିତ

ଆଉ ପ୍ରକାଶିତ ହେଲା କିଛି ,

ମାଆ ମୋ ଖୁସିରେ ମତଟି ରଖିଲେ

ଝିଅ ଲେଖିକା ହୋଇଛି ।

ଆତ୍ମୀୟସ୍ୱଜନ ଦେଖାହେଲେ ଯେବେ

ମୋ କଥା କହିଲେ ମାଆ ,

ଝିଅ ଲେଖା ଏବେ ରେଡ଼ିଓରେ ବାଜେ

କହୁଛି ତା' ନାଆଁ-ଗାଆଁ ।

ଶୈଶବ କାଳରୁ ହାତଧରି ମାଆ

ପଢ଼ାଉଥିଲେ ତ ପାଠ ,

ଗପ ଗୀତ କହି ଶିକ୍ଷା ଦେଉଥିଲେ

ହେବାକୁ ଉତ୍ତମ ଚାଟ ।

ମଧୁ ,ଗୋପବନ୍ଧୁ, ଲକ୍ଷ୍ମୀବାଇ କଥା

ଶୁଣିଥିଲି ତାଙ୍କଠାରୁ ,

ଆଉ କିଛି ଜ୍ଞାନ ଅର୍ଜନ କରିଲି

ପତ୍ରିକା ଓ ପୁସ୍ତକରୁ ।

ସବୁଠୁ ଅଧିକ ପ୍ରେରଣାଟି ଦେଲେ

ଲେଖିବାକୁ ମୋତେ ମାଆ ,

ଗୋଟେ ପରେ ଗୋଟେ ଲେଖା ମୁଁ ରଚିଲି

ତା' ପରେ ଛାଆଁକୁ-ଛାଆଁ ।

ଆଜି ମୁହିଁ ଜଣେ ସଫଳ ଲେଖିକା

ପାଠକ ଦିଅନ୍ତି ମତ ,

ଲେଖିବାକୁ କିନ୍ତୁ ପ୍ରଥମେ ମୋ ମାଆ

କରିଥିଲେ ଉତ୍ସାହିତ ।