ଲଣ୍ଠନକୁ ଭୁଲ ନାହିଁ

ଦିନଥିଲା ଯେବେ ପ୍ରତି ପରିବାରେ,

ଲଣ୍ଠନଟେ ଥିଲା ରହି ।

ଘନ ଅନ୍ଧକାର ହୁଏ ଦୂରିଭୁତ,

ଏହାର ଆଲୋକ ପାଇଁ ।।

ସଭିଙ୍କର ସାଥୀ ଏଇ ଲଣ୍ଠନ ଯେ,

ହେଉ ବା ଗରିବ ଧନି ।

ବିନା ବିଦ୍ୟୁତରେ ଲଣ୍ଠନକୁ ସର୍ବେ,

ଚଳୁଥିଲେ ସାଥେ ଘେନି ।।

ଲଣ୍ଠନ ପାଇଁ ତ ସଳିତାଟେ ଲୋଡା,

ପୁଣି କିରୋସିନି ତେଲ ।

ପବନ ବହିଲେ ନ ଲିଭେ ଲଣ୍ଠନ,

ଏହା ଏକ ଗୁଣ ଭଲ ।।

ନିର୍ବାଚନ ବେଳେ ମତଦାନ ପାଇଁ,

ଲଣ୍ଠନର ଆବଶ୍ୟକ ।

ମତଦାନ ଘରେ ଅନ୍ଧାର ମଧ୍ୟରେ,

ଏହା ଯୋଗାଏ ଆଲୋକ ।।

ଏବେ ଘରେ ଘରେ ନ ମିଳେ ଲଣ୍ଠନ,

ଆଧୁନିକତାର ଛାପ ।

ସୌର ଶକ୍ତି ଆଉ ବିଦ୍ୟୁତ୍ ପାଇଁ ତ,

ଲଣ୍ଠନ ପାଇଛି ଲୋପ ।।

ଲଣ୍ଠନକୁ ସଦା ରଖିଥିବା ପାଖେ,

ଜରୁରୀ ସମୟ ପାଇଁ ।

ବହୁ ଉପକାରେ ଆସିବ ଏ ଚିଜ,

ଲଣ୍ଠନକୁ ଭୁଲ ନାହିଁ ।।