ଲେଖା ପଛର ପ୍ରେରଣା

ମଳୟ ପବନ ଶୀତଳ କାରଣ

ହୃଦତାପ ବିନାଶନ,

ଶାନ୍ତଶୀଳ ମନ ପ୍ରକୃତ ସୁଧନ

ପ୍ରେରଣାର ମହାଦାନ |୧|

କର୍ଣ୍ଣରେ ଶ୍ରବଣ ମୁଖରେ ବଚନ

ହସ୍ତ ଲେଖା ପ୍ରଭୁ ଦାନ,

ସ୍ବର୍ଗୀୟ ଶକ୍ତିର ଆଶୀର୍ବାଦ ଝର

ଲେଖା ପଛର କାରଣ |୨|

ମାତା ବୀଣାପାଣୀ କଣ୍ଠରେ ଆସ୍ଥାନୀ

ପଦମାନ ଯୋଡ଼ିଦେଇ,

ପ୍ରଭୁ ଗଜାନନ ଦୟା ଦାନ ମାନ

ଶୁଭ ଲେଖା ହୋଇଥାଇ |୩|

ଗୁରୁଙ୍କ ପ୍ରେରଣା ଆଶୀର୍ବାଦେ ଗଣା

ଶୁଭ ଚିନ୍ତା ଆସେ ମନେ,

କାଳଜୟୀ ଲେଖା ଆପେ ହୁଏ ଯୋଖା

କବି ମୁଖେ ପରଶନେ |୪|

ଯେବେ ମୁଁ ଲେଖିଲି କାଳିଆ ଭଜନ

ମନେ ସ୍ମରି ଜଗନ୍ନାଥ,

ତାଙ୍କରି କରୁଣା ତାହାଙ୍କୁ ତ ଜଣା

ଲେଖି ଦିଏ ମୋର ହାତ |୫|

Advertisement

p>

ପ୍ରଥମେ ଶୁଣାଏ ମୋ ଲେଖା କବିତା

ବଂଧୁ କିମ୍ବା ଛାତ୍ରଗଣେ,

ତାଙ୍କ ଶୁଣିବାରେ ପାଏ ମୁଁ ପ୍ରେରଣା

ଅଧିକ କବିତା ଭଣେ |୬|

କିଏ ଶୁଣୁ ଅବା ନ ଶୁଣୁ କବିତା

ନିତି ନିତି ଲେଖିଯାଏ,

ସାମାନ୍ୟ ଟିକିଏ ପ୍ରେରଣା ପାଇଲେ

ମନେ ମନେ ଖୁସିହୁଏ |୭|

ଲେଖା ପଛର ତ ପ୍ରକୃତ ପ୍ରେରଣା

ପୁସ୍ତକ ପଠନ ଦେଲା,

ଜ୍ଞାନ ଅରଜନ ପୁଣି ଆଲୋଚନ

ଆହୁରି ସୁଦୃଢ଼ ହେଲା |୮|

ପରିବାର ଜନ ଆହୁରି ପ୍ରେରଣା

ଦିନୁ ଦିନ ଯୋଗାଇଲେ,

ମୋ ସହଧର୍ମିଣୀ ଅଧିକ କର୍ମିଣୀ

ମୋ ଲେଖା ଆଗେ ଶୁଣିଲେ |୯|

କବି ବଂଧୁଗଣେ ଲେଖକ ଗହଣେ

ମୋ ଲେଖା ଆଦୃତ ହେଲା,

ପ୍ରେରଣାର ଉତ୍ସ ସେମାନେ ନମସ୍ୟ

ମୂଳଦୁଆ ଗଢ଼ାହେଲା |୧୦|