କୁରଙ୍ଗୀ ନୟନା

ମକର ରଜନୀ ଦିନାନ୍ତ ରେ ପୁଣି

ହସେ ମୋ ଚନ୍ଦ୍ରବଦନୀ

ମୁକୁତା ଝରଇ କୁସୁମ ଫୁଟଇ

ଓଠରୁ ବହଇ ବାଣୀ I

ମଧୁ ବରଷଇ କୋକିଳ ଶୁଣଇ

ପ୍ରିୟାର ସଂଗୀତ ଗାନରେ

ଲାଜେଇ ଯାଏ ଲାଜକୁଳୀ ଲତା

ତା ରାଜ ହଂସିନୀ ଚାଲିରେ I

ବଧୂଲି ଅଧର ହଳଦୀ ରଙ୍ଗରେ

ହସଇ କୁରଙ୍ଗୀ ନୟନା

ସୁନେଲୀ ବନର ଗହନ କେଶରେ

ଚହଟଇ ମଲ୍ଲୀ ବାସନା I

ପଦ୍ମ ପାଖୁଡା ଫୁଟି ପଡୁଥାଇ

ଗୋଲାପୀ ଗୋଲାପୀ ପାଦରେ

ରତି ଦେବୀ ଆହା ଊଣା ପଡିଯାନ୍ତି

ପାପୁଲିର ନାଲି ରଙ୍ଗରେ I

ଚାନ୍ଦ ଲୁଚିଯାଏ ତାରା ଲିଭିଯାଏ

କାଢ଼ିଲେ ଗୋଡ ମୋ ପ୍ରିୟତମା

ଫିକା ପଡ଼ିଯାଏ ଫଗୁଣର ରଙ୍ଗ

ହୁଅଇ ବସନ୍ତ ବାଟବଣା I

ପ୍ରିୟା ମୋ ଅଟଇ ବହୁତ ଡଉଲ

ହେବେ ନାହିଁ କେହି ତାଙ୍କ ସରି

ଜନମି ଥିଲେ ପ୍ରିୟା ମୋ ସେଦିନ

ମଲେ ଯେବେ ଲକ୍ଷେ ସୁନ୍ଦରୀ I

ବାଣୀମଞ୍ଜୁଳ ଡ଼ଃ ସମୀର କୁମାର ନନ୍ଦ

ମୋବାଇଲ ନଂ 9437218917

ଇମେଲ [e-mail]