କରିଛନ୍ତି ବାପା-ଜେଜେ

ଚାଲ ଆମେ ଦୁହେଁ ଖେଳିବା ଏଇଠି 

ସାଇକେଲ ଦେବା ରଖି ,

ଭାରି ବଢ଼ିଆ ଏ ଜାଗାଟା ଲାଗୁଛି

ବିଲକୁଲ ମନଲାଖି ।

ମାରିଆକୁ ଆମ ସାଥିରେ ରଖିବା

ବୁଲାବୁଲି କଲାବେଳେ ,

କେତେ କଉତୁକ କରେ ପରା ସିଏ

ପାଖେ ପାଖେ ଥିଲାବେଳେ ।

ବଲ ଫୋପାଡ଼ିଲେ ଗୋଟାଇ ଆଣିବ

ଆମରି ଇଶାରା ପାଇ,

ବୁଲା ଜୀଵଙ୍କୁ ସେ ଘଉଡ଼ାଇ ଦେବ

ପଛରେ ଗୋଡ଼େଇ ଯାଇ ।

ବଗିଚାରେ ଆମେ ବୁଲାବୁଲି କରି

ତୋଳିକି ଖାଇବା ଫଳ ,

ବାପା କହୁଥିଲେ ଫଳ ଖାଇଲେ ତ

ବଢ଼ିବ ଦେହର ବଳ ।

କେଡ଼େ ଯତନରେ ଏ ଫଳ ବଗିଚା

କରିଛନ୍ତି ବାପା-ଜେଜେ ,

ଚାହିଁଲେ ବି ତାଙ୍କୁ କିଛିଟା ସାହାଯ୍ୟ

କରିପାରିବାଟି ନିଜେ ।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ ।