କରିବେ ନଉକା କେଳି

ଚନ୍ଦନ ଯାତରେ ଚାପ ଖେଳିବେ ସେ

ନରେନ୍ଦ୍ର ପୋଖରୀ ଜଳେ ,

ଆନନ୍ଦରେ ସାରା ରାତି ବିତାଇବେ

ସେ ଯେ ଭକତଙ୍କ ମେଳେ ।

ଗ୍ରୀଷମର ଦାଉ ବଡ଼ ବିଷମଟି

ହୁଏ କେତେ ଗୁଳୁଗୁଳି ,

ସେଇଥିପାଇଁକି ଦେଉଳୁ ବାହାରି

କରିବେ ନଉକା କେଳି ।

ଶଙ୍ଖ ହୁଳହୁଳି ଶବଦରେ ସାରା

ଅଞ୍ଚଳ ଉଠିବ ପୂରି ,

ମହାନନ୍ଦେ ସର୍ବେ ଜୟ ଜଗନ୍ନାଥ

ପକାଉଥିବେଟି ହୁରି ।

ଭକତଙ୍କ ହାରି ଗୁହାରି ଶୁଣିବେ

କାନ ଡେରି ଚକାଆଖି ,

ମନୋବାଞ୍ଛା ଯେତେ ପୂରଣ କରିବେ

ରଖିବେନି କିଛି ବାକି ।

ସେବେଳରେ ତାଙ୍କୁ ଦର୍ଶନ କରିବା

ଆମ୍ଭେ ଦୁଇବାହୁ ତୋଳି ,

ମନ ପ୍ରାଣ ସବୁ ସମରପି ଦେବା

'ଜୟ ଜଗନ୍ନାଥ ବୋଲି' ।

ମାମୁରିଆ, ଛେଣ୍ଡିପଦା,ଅନୁଗୋଳ ।