କିଏ ସେହି ଧାମ

କିଏ ସେହି ଧାମ ମରତେ ବୈକୁଣ୍ଠ

ଦେବତାଙ୍କ ଯହିଁ ବାସ

ପ୍ରତିଟି କ୍ଷଣରେ ଆନନ୍ଦ ବିହରେ

ଦୁଃଖ, ଶୋକ କରି ନାଶ ।

ସେନେହ ଆଦର ସମ୍ପର୍କର ଡୋର

ପ୍ରେମେ ହୋଇଅଛି ବନ୍ଧା

ମଧୁଭରା ବାଣୀ କର୍ଣ୍ଣ ଥାଏ ଶୁଣି

ମମତାରେ ଶିଶୁ ଛନ୍ଦା ।

ଗୀତା ଭାଗବତ ହୁଅଇ ଶ୍ରବଣ

ସକାଳେ ସନ୍ଧ୍ୟାରେ ନିତି

ବୃନ୍ଦାବତୀ ମୂଳେ ସଞ୍ଜବତୀ ଜଳେ

କେଉଁ କାଳରୁ ଏ ରୀତି ।

ଦେବତା ରୂପରେ ଅତିଥି ବିରାଜେ

ଗାଏ ଗଉରବ ଗାନ

ସେବା ତିତୀକ୍ଷାର ଉଡେ ବୈଜୟନ୍ତ

ବଢାଇ ଜାତିର ମାନ ।

ଭରଷା ବିଶ୍ୱାସ ସଦା କରେ ବାସ

ସଭିଏଁତ ଛନ୍ଦାଛନ୍ଦି

ପ୍ରେମର ରଜ୍ଜୁରେ ଏକତା ସୂତ୍ରରେ

ଯେଉଁଠି ସଭିଏଁ ବନ୍ଦୀ ।