କିଏ ସେ କେମିତି ଦେଖୁଛି ଜାଣେନା ମୁଁ ଜାଣେ ନିଜକୁ କବି

କିଏ ସେ କେମିତି ଦେଖୁଛି ଜାଣେନା

ମୁଁ ଜାଣେ ନିଜକୁ କବି

ମନର କାଗଜେ ନିଜର ଇଛାରେ

ଆଙ୍କୁଛି ବଢ଼ିଆ ଛବି

 .........କିଏ ସେ କେମିତି ଦେଖୁଛି ଜାଣେନା

              ମୁଁ ଜାଣେ ନିଜକୁ କବି ! ୦ !

ନିଜକୁ ଜାଳିକି ଆଲୋକ ଦେବାରେ

କରୁନି ସାମାନ୍ୟ ହେଳା

ଲୁହକୁ ଶୁଖାଇ ଲହୁରେ ଲେଖୁଛି

ମୁଁ ପରା ଭାବର ଭୋଳା

ଦୁଃଖରେ ମୁଁ ରହିବି ପଛକେ

ସୁଖକୁ ବାଣ୍ଟୁ ମୁଁ ଥିବି

 .........କିଏ ସେ କେମିତି ଦେଖୁଛି ଜାଣେନା

              ମୁଁ ଜାଣେ ନିଜକୁ କବି ! ୧ !

ପ୍ରେମରେ ନ ଥାଇ ପ୍ରେମରେ ପଡ଼ିଛି

ଫୁଲରେ ରଖିଛି ଗେଲ

କଣ୍ଟାର ଆଘାତ ସହିବା ପାଇଁକି

ରାଣକୁ ଖାଇଛି ଭଲ

ଉଦାର ହୃଦୟ ପାଲଟି ସତରେ

ସହଜେ ଯାଉନି ଦବି

 .........କିଏ ସେ କେମିତି ଦେଖୁଛି ଜାଣେନା

              ମୁଁ ଜାଣେ ନିଜକୁ କବି ! ୨ !

ଈର୍ଷାର ସହରେ କିଏ ବା କୋଉଠି

ଦେବାକୁ କଳଙ୍କ ଟୀକା

ତା ମନ ଖୁସିରେ କପାଳ ନୁଆଁଏ

ମୁଁ ଏକ ନିରୀହ ବୋକା

କଳ୍ପନା ଭିତରେ ଖିଆଲୀ ମଣିଷ

କଳ୍ପଣା ମୁଁ ଭୁଲି ଯିବି

 .........କିଏ ସେ କେମିତି ଦେଖୁଛି ଜାଣେନା

              ମୁଁ ଜାଣେ ନିଜକୁ କବି ! ୩ !