କାଳିଆ ସାଆନ୍ତେ ହୋ

ସଂସାରଟା ଆଜି ଜଗନ୍ନାଥ ମୟ

ଚତୁର୍ଦ୍ଦିଗେ କୋଳାହଳ

ଟିଭି କାଚ ଠାରୁ ବଡ଼ ଦାଣ୍ଡ ଯାଏଁ 

ସମସ୍ତେ ଚଳ ଚଞ୍ଚଳ୧

ଶବ୍ଦ ମୟ ଆଜି ପୁରୀ ବଡ଼ ଦାଣ୍ଡ

ଘଣ୍ଟ ଘଣ୍ଟା ଓ ଭକତ

ଦେହ ମନ ଆଜି ହୁଏ ଶିହରଣ

ଆସିବେ ଜଗତନାଥ୨

ସାରା ବିଶ୍ବରୁ ଛୁଟି ଥାନ୍ତେ ଲୋକେ

ଦେଖିବାକୁ ଘୋଷ ଯାତ

ସଭିଙ୍କ ମନରେ ଦୁଃଖର ଜୁଆର

କରୁଚି ତାଣ୍ଡବ ନୃତ୍ୟ୩

ଭୂତାଣୁଟେ ଆଜି ରାଜୁତି କରୁଛି

ସର୍ବେ ହୋଇଲେ ପରାସ୍ତ

ଆନନ୍ଦ ଉଲ୍ଲାସ ସାରି ଦେଲା ସବୁ

ଗୃହେ କରିଲା ଆକଟ୪

ଗୃହରେ ଆକଟ ମନ ଛଟ ପଟ

ଦର୍ଶନୁ କଲେ ବଞ୍ଚିତ

କିପରି ସମ୍ଭବ ସାରା ବିଶ୍ଵ ବାସୀ 

ସମସ୍ତେ ଅପେକ୍ଷା ରତ୫

ଭକତଙ୍କ ଲୁହ ପ୍ରେମ ବନ୍ଧନରେ 

ଆନନ୍ଦରେ ଗଡ଼ି ରଥ

କେମିତି ହେ ପ୍ରଭୂ ବିନା ଭକତରେ

ହେବ ତୁମ ଘୋଷ ଯାତ୬

ଭକତ ବତ୍ସଳ ଭାବର ଠାକୁର 

ପ୍ରେମ ବନ୍ଧନରେ ବନ୍ଧା

ପ୍ରେମ ଓ ଭକ୍ତିକୁ ଘରେ ବାନ୍ଧି ଦେଲେ

କାନ୍ଦିବେ ଭକ୍ତଙ୍କ ସଖା୭

ଲୁଚାଇ ଲୁଚାଇ ପ୍ରଭୂ କାନ୍ଦୁ ଥିବେ 

ଖୋଜୁଥିବେ ଭକତଙ୍କୁ

ସତେ କଣ ପ୍ରଭୂ ନିରାଶ ମନରେ

ଫେରିବେ ଶ୍ରୀ ମନ୍ଦିରକୁ୮

ସେଇ ଏକା ଗିରି ଗୋବର୍ଦ୍ଧନ ଟେକା

ସେଇ ରଚିଥିଲା ଗୀତା

ବାଲିର ରଥରେ ବଳରାମ ଦାସ

ତାଙ୍କୁ ଦେଇଥିଲା ଦେଖା ୯

ପାତାଳେ ଚାପିଲା ମହାଦାନୀ ବଳି

ତାହା ତେ ସବୁ ସମ୍ଭବ

ସିଏ ହିଁ ଚାହିଁଲେ ସବୁ ବିପଦରୁ

ସୃଷ୍ଟି ଉଦ୍ଧାର କରିବ ୧୦

ସାଲବେଗ ପାଇଁ ବଡ଼ ଦାଣ୍ଡେ ଦିନେ

ଅଟକି ଗଲା ତ ସେହି

ସାରା ବିଶ୍ୱେ ହେବ ଆଜି ଘୋଷ ଯାତ

ଚାହିଁଲେ ଜଗତ ଶାଇଁ ୧୧

ଭାବର ସାହରେ ଭାବର ପସରା

ଖୋଲିବେ କାଳା ଠାକୁର

ସେଇ ପସରାରୁ ବିନ୍ଦୁଏ ବିନ୍ଦୁଏ 

ଲଭିବ ସାରା ସଂସାର ୧୨