ଜନ୍ମ ଦିବସ

 ଆଜିର ଏଇ ପବିତ୍ର ଦିବସେ

           ଜନମିଥିଲ ତୁମେ ଏ ଧରାରେ,

କେତେ ଘାତ ପ୍ରତିଘାତ ସହିଣ

      ସେବିଛ ଆମକୁ ନିଃସ୍ୱାର୍ଥ ଭାବରେ ।

                                କେତେ ଜୁଆର ଭଟା ଲହଡିରେ

                                          ଦୋହଲିଛି ଆମ ଜୀବନ,

                                କୁଳରେ ନାଆକୁ ଲଗାଇ ଦେଇଛ

                                     ତୁମେ ସର୍ବଦା ନାଉରୀ ହୋଇଣ ।

ଜୀବନ କାଳରେ ଦେଖି ଦେଇଅଛ

       ବାଆ ବତାସ ଝଡ କେତେ,

ପାଦେ ପାଦେ ପଥ ଦେଖାଇ ଆସିଛ

      ସେନାପତି ସାଜି ତୁମେ ସତେ ।

                                ଜନନୀ ଭଗିନୀ ଜାୟାର ଦାୟିତ୍ୱ

                                      ଥିଲା ଯେ କେତେ ତୁମ ଉପରେ,

                                ତଥାପି ତୁମେ ସହିଣ କଷଣ

                                     ମଣିଷ କଲ ଆମକୁ ସଂସାରରେ ।

କେତେ ରାଗ ଋଷା ମାନ ଅଭିମାନ

           କରିଛି ମୁଁ ତୁମ ଉପରେ,

ସବୁ ହସି ହସି ଯାଇଅଛ ପିଇ

           ନରଖି କିଛି ମନ ଭିତରେ ।

                                     ଅଣଚାଷ ତମ ଜନମ ଦିନରେ

                                          ଏତିକି ମାଗୁଣି ବିଭୁ ପୟରେ,

                                     ଆଗାମୀ ଦିନ ତୁମ କଟିଯାଉ ସଦା

                                          ସୁଖ ଶାନ୍ତି ସୁସ୍ଥ ସମୃଦ୍ଧିରେ ।