ଜୀବନ୍ତ ଠାକୁର

ଜୀବନ୍ତ ଈଶ୍ୱର ,ସ୍ଵରୂପ ତାଙ୍କର

ଦେଖିନାହିଁ ମୁଁ ଚକ୍ଷୁ ରେ ।

ଦେଖୁଛି ଦୁହିଁଙ୍କୁ ,ଜୀବନ୍ତ ମୋ ପ୍ରଭୁ

ମାତା ପିତା ଏ ମହୀରେ ।।୧

ଜନ୍ମ ଦେଇ ମୋତେ ,ଆଣିଲେ ସଂସାରେ

ସାଜିଣ ଯେ ସୃଷ୍ଟି କର୍ତ୍ତା ।

ଆହାର ଦେଇଣ ,କଲେ ଯେ ଲାଳନ

ସାଜିଣ ପାଳନ କର୍ତ୍ତା ।।୨

ଦୁଷ୍ଟାମି ର ଯେବେ, ଚରମେ ପହଞ୍ଚେ

ସାଜନ୍ତି ଶାସନ କର୍ତ୍ତା ।

ଅବାଟରେ ଗଲେ, ବାଟ ଯେ ଦେଖାନ୍ତି

ଦିଅନ୍ତି ନୂତନ ବାର୍ତ୍ତା ।।୩

ଅଜ୍ଞାନ ଅନ୍ଧାର, ଦୂର କରି ମୋର

ସାଜିଲ ପ୍ରଥମ ଗୁରୁ ।

ଜୀବନେ ମାଗୁଣି ,ଯାହା ମୁଁ କରିଛି

ଦେଇଛନ୍ତି ଶୁଣିବାରୁ ।।୪

କେତେ ମୁଁ ଡାକିଛି ,ମନ୍ଦିର ସମ୍ମୁଖେ

ନ ଦେଲେ କେହି ଉତ୍ତର ।

ଡାକେ ମୁହିଁ ଯେବେ ,ମାତା ପିତା ଶବ୍ଦେ

ଦିଅନ୍ତି ପ୍ରତି ଉତ୍ତର ।।୫

ମୋର ଦୁଃଖେ ଦୁଃଖୀ ,ସୁଖେ ମୋର ସୁଖୀ

ଥାଆନ୍ତି ହୋଇ ଯେ ସିଏ ।

ତାଙ୍କ ଛଡ଼ା ମୁହିଁ, ଆଉ ଜାଣିନାହିଁ

ଈଶ୍ୱର ଅଛନ୍ତି କିଏ ।।୬

ସେହି ଯେ ମାେ ପାଇଁ ,ଚଳନ୍ତି ଠାକୁର

ଲାଗନ୍ତି ଭାରି ସୁନ୍ଦର ।

ତାଙ୍କ ଠୁ ନିଜର ,ନାହିଁ କେହି ମୋର

କଥା କୁହା ସେ ଠାକୁର ।।୭

ତାଙ୍କରି ଚରଣେ ,ମୋର ମନ ପ୍ରାଣ

ମୋ ହୃଦେ ତାଙ୍କରି ସ୍ଥାନ।

କରୁଥିବି ସଦା ,ଜୀବନରେ ପୂଜା

ଦୁହେଁ ମୋର ଭଗବାନ ।।୮