ଜହ୍ନର ଠିକଣା

ଜହ୍ନ ଗୋ ତୁମେ ଚିରା ଚାଳ ଫାଙ୍କେ 

କେବେ ଦାରିଦ୍ର୍ୟତା ଚିହ୍ନ 

ଜହ୍ନ ପୁଣି ତୁମେ କଇଁର ଆଖିରେ 

କେତେ ଯେ ଅଦେଖା ସ୍ୱପ୍ନ 

କେବେ ଶଶକର ପ୍ରଶ୍ନ 

ଜହ୍ନ ଗୋ ତୁମେ ଜହ୍ନି ଫୁଲ ପାଇଁ 

ମିଳନର ମଧୁ ଲଗ୍ନ 

ଜହ୍ନ ଗୋ ତୁମେ ଆକାଶ କପାଳେ 

କେବେ ସ୍ୱୀକାରର ବିନ୍ଦୁ 

ଜହ୍ନ ପୁଣି ତୁମେ ନକ୍ଷତ୍ର ମଣ୍ଡଳେ 

ରୋହିଣୀଙ୍କ ପ୍ରାଣ ବନ୍ଧୁ 

ପିତା ଯେ ତୁମର ସିନ୍ଧୁ 

ଜହ୍ନ ଗୋ ତୁମେ ଅନ୍ଧାରକୁ ଚିରି 

ଆଲୋକର ପୂର୍ଣ୍ଣ ଇନ୍ଦୁ 

ଜହ୍ନ ଗୋ ତୁମେ କୁନାର ହାତରେ 

ଦି ମୁଠା ଅଦେଖା ଖୁସି 

ଜହ୍ନ ପୁଣି ତୁମେ ଶରତ ଆକାଶେ 

ପ୍ରକାଶର ଜ୍ୟୋତି ରାଶି 

ଶଙ୍କରଙ୍କ ଶିର ବାସୀ 

ଜହ୍ନ ଗୋ ତୁମେ ଜୁଆର ଭଟ୍ଟାରେ 

ପାପ ପୁଣ୍ୟ ଦିଅ କଷି