ଜାଗରିତ ମୋ କାବ୍ୟପୁରୁଷ

ଲେଖିଚି ମୁଁ ଏମାଟିର କଥା,

ଯେଉଁମାନେ ସହିଚନ୍ତି

ଜୀବନରେ ଅସୁମାରୀ ବ୍ୟଥା।

ଯେଉଁମାନେ ଦେଇଛନ୍ତି ପ୍ରାଣ

ସଗୌରବେ ରଖିଛନ୍ତି

ଏ ମାଟିର ଟାଣ।

ସେଇଯୁଗଜନ୍ମାଙ୍କର ଜୀବନ ବିନ୍ୟାସ

ଆଉ ଆତ୍ମ ବଳିଦାନ

ଲେଖନୀ ମୋ ଦେଇଅଛି ରୂପ

କଳାର ଚାତୁରୀଭରି

କରିଅଛି ତାଙ୍କ ଗୁଣଗାନ ।

ଯଦିଓ ସେ ମହାନୁଭବଙ୍କ

ଗୁଣ ଗାନପାଇଁ

ମୋପାଖରେ ଉପଯୁକ୍ତ

ସାମର୍ଥ୍ୟହିଁ ନାହିଁ

ତଥାପି ମୁଁ ପ୍ରାଣପ୍ରଣେ

କରିଅଛି ଚେଷ୍ଟା,

ହୃଦେରଖି ଧୈର୍ଯ୍ୟ ଆଉ

ମନେରଖି ଐକାନ୍ତିକ ନିଷ୍ଠା ।

ଥକିନାହିଁ ମୋ କାବ୍ୟ ପୁରୁଷ

ଅନ୍ବେଷଣେ ରତସିଏ

ପ୍ରକାଶିବ ନୂତନ ସନ୍ଦେଶ

ପୃଥିବୀ ପ୍ରକୃତି ଜଳ

ସ୍ଥଳ ଓ ଆକାଶ

ଜୀବନ ଜ୍ୟାମିତି ପରିମିତି ଇତିହାସ

ସବୁଠିଁ ତା ଦୃଷ୍ଟିଅଛି

ଦୃଷ୍ଟିଅଛି ଅଂତର ବାହାର

ଦୃଷ୍ଟିଅଛି ଖରା ଛାଇ

ଆଉପୁଣି ଆଲୋକ ଅନ୍ଧାର

ଖୋଲିବାକୁ ଏସୃଷ୍ଟିର

ସମସ୍ତ ରହସ୍ୟ

ଜାଗରିତ ମୋ କାବ୍ୟ ପୁରୁଷ ।

କୈଳାସ ଚନ୍ଦ୍ର ପାଢୀ।କୁମାରପୁର।