ହେ ମହାମହୋପାଧ୍ୟାୟ
ହେ ମହାମହୋପାଧ୍ୟାୟ
ହେ ମହାମହୋପାଧ୍ୟାୟ ଚନ୍ଦ୍ରଶେଖର ସିଂହ
ହରିଚନ୍ଦନ ମହାପାତ୍ର ସାମନ୍ତ
ଓଡିଶା ମାଟିର ଧ୍ରୁବତାରା ତୁମେ
ବିଜ୍ଞାନକୁ କରିଗଲ ଜୀବନ୍ତ ।
ନୟାପଡା ଜିଲ୍ଲା ଖଣ୍ଡପଡ଼ା ଗଡେ
କୃଷ୍ଣ ପୌଷ ଅଷ୍ଟମୀରେ
ରାଜା ଶ୍ୟାମବନ୍ଧୁ ରାଣୀ ବିଷ୍ଣୁମଲ୍ଲୀ
ନାଚିଲେ ତୁମ ଜନ୍ମରେ ।
ତୁଳସୀ ପରାୟେ ବାସି ମହକିଲ
ହସିଲା ଓଡ଼ିଆ ଭୂଇଁ
ଗୁରୁ ପିତା ମାତା ବିସ୍ମୟେ କହିଲେ
ଧନ୍ୟ ବୈଜ୍ଞାନିକ ତୁହି ।
ନିଜର ଛାଇକୁ ମାପୁଥିଲ ଯେବେ
ଭାବିଲେ ସର୍ବେ ପାଗଳ
ଚିଲ ଶାଗୁଣାଙ୍କ ବେଗ ମାପିଲାରୁ
ଥଟ୍ଟା ମଜା ହେଲା ଖେଳ ।
ଖାଲି ଆଖି ଅଣୁବୀକ୍ଷଣ ଯନ୍ତ୍ରଟା
ବାଉଁଶ ନଳୀର ସାଥେ
ଦୁଇ ଖଣ୍ଡ କାଠି ମାପିଲା ଦୂରତା
ପୃଥିବୀରୁ ନଭ କେତେ ?
ପୁରାତନ ଜ୍ୟୋତିର୍ବିଜ୍ଞାନୀ ହେ ଦେବ
ଅନୁମାନ କରି କେନ୍ଦ୍ର
ଗ୍ରହ ନକ୍ଷତ୍ରଙ୍କ ଦୂରତା ମାପିଲ
ହସୁଥିଲା ଧରାକେନ୍ଦ୍ର ।
ପର୍ଯ୍ୟବେକ୍ଷଣ ଓ ଗବେଷଣା ମନ୍ତ୍ରେ
ହିସାବକୁ କଲ ତନ୍ତ୍ର
ସିଦ୍ଧାନ୍ତ ଦର୍ପଣ ପୁସ୍ତକ ଖଞ୍ଜିଲ
ଦେବ ଭାଷା ବୁଦ୍ଧି ଯନ୍ତ୍ର ।
ନିଦ ହଜାଇଲ ରାତି ଭୁଲିଗଲ
ଜ୍ୟୋତିର୍ବିଜ୍ଞାନୀ ଲକ୍ଷ୍ୟରେ
ପୁଣ୍ୟ ଭାରତୀୟ ସଂସ୍କୃତି କମ୍ପିଲା
ପଠାଣି ଉଚ୍ଚ ଡାକରେ ।
ବିଜ୍ଞାନକୁ ଦେଇ କି ଉଦାହରଣ
ତା ମଧ୍ୟେ ତୁମେ ତ ଶ୍ରେଷ୍ଠ
ଆଜି ଶୁଭ ଦିନେ ଜଣାଉ ଶୁଭେଚ୍ଛା
ଘେନ ହେ ଆଚାର୍ଯ୍ୟ ଜ୍ୟେଷ୍ଠ ।